Ráltlânte chhawmdàwl dan sawihona nei

Lunglei additional DC Donny Lalruatsanga kaihhruaiin nimin khan Lungleiah Advocacy cum Sensitization Programme buatsaih a ni a; district bawrhsap Kulothungan A-in hmanpuiin, ráltlânte tana chhawmdawlna kalpui meka hmalak tawhnate ṭha a tih thu a sawi.

Ṭhutkhawmah hian, Lunglei district-a ráltlân awmte mamawh hrang hrang ruahmansak tura hma la mektu The Adventist Development and Relief Agency (ADRA)-te'n Lunglei district-a ráltlânte tana an hmalaknate an tarlang. ADRA project, Comprehensive Assistance to Vulnerable Refugees in Southern Mizoram (CAR Project) chu kumin July 1 aṭanga November 30 chhung kalpui a ni.

Lunglei district-ah ráltlân awmna camp 10 a awm a, chu'ng zinga pali-ah high density polyethylene (HDPE) tui pipe leh tui connection dah a ni. Camp dangah pawh tui connection leh tui dah khawlna tuizem, tui litre 1,000 dawng dah a ni tawh a, tui tih thianghlimnate dah a nih tawh bakah, vantlang inthiarnate siam a ni tawh.

ARDA project hnuaiah hian protection programme kalpui a ni a; naupang, hmeichhia, pianphunga rualbanlo, tar chak lo leh LGBTQIA+ (neih inang inkawp)-te harsatna sutkianna atan Gender Balanced Camp Committee din a ni.

Ráltlânte mamawh hrang hrang bakah, naupang tan zirna kaihhnawih eng emaw zat pek a ni a, infiamna tur hmun 50 siam a ni tawh bawk.