KHAWTHLIR

Thisen pe
HDFC Bank chuan nimin khan Civil Hospital, Aizawl Blood Bank-ah thisen pek huaihawtin, thisen unit 35 an pe a, petute mipa 27 leh hmeichhia pariat an ni.

UPC hruaitu thlang
Mizoram UPC rorelna sang, Executive Committee nimina neihah UPC hmeichhe pawl, Ladies Auxiliary Department leh ṭhalai pawl PYD hruaitu tur thlan a ni. General LAD president-ah RMS Dawngkimi, Ramhlun South leh secretary atan Lalthansangi, Bungkawn thlan an ni a; PYD president atan Upa R Vanlalruata leh secretary atan John Zothansanga, Durtlang thlang an ni.

Clinic hawng
Aizawl South-III bialtu MLA Prof. F Lalnunmawia chuan nimin khan a bial chhunga khaw pathum - Chawilung, Chamring leh Lungseiah health clinic centre thar a hawng. MLA chuan, health clinic thara thawktu turte chu SEDP sum hmangin rawih a nih dawn thu a sawi.

Tlawng lui sawiho
Tlawng lui humhalh chungchangah nimin khan Planning Board vice chairman H Rammawi kaihhruaiin Planning Committee Room-ah sorkar hotute an ṭhukhawm.

Civil registration
Economics & Statistics department chuan nimin khan Champhai DRO training hall-ah Champhaia registrar of births & deaths (RBD)-te tan Civil Registration System chungchang inhrilhfiahna an buatsaih a; Champhai district registrar of births & deaths James Lalrinchhana, DC-in a hmanpui.

Sumdawnna hmanga inchîmral sawiho
Mizoram First pawl chuan nimin khan Aijal Club-ah 'Sumdawnna hmanga inchîmral theihna kawng’ tih thupui sawihona an buatsaih. Mizoram First hruaitu ZR Ṭhahmingliana’n sawihawnna hun a hmang a; panelist - Prof. Vanlalchhawna, MZU, Central YMA vice president Lalhmachhuana leh MIMA president PC Laldinthara ten thupui an sawi. Political party hrang hrang aiawh te, a kaihhnawih sorkar department/agency aiawhte an tel a ni.