Synod-in chak zawka corruption do a rél ; Mizoram hruaitute khalh ngil an tum dawn

Synod Inkhawmpui vawi 99-na, Khatla Kohhran Biak-ina neih mek chuan chak zawk leh ṭha zawka corruption do nimin khan an rêl a, Mizoram hruaitute khalh ngil turin chak zawka hmalak an rél bawk.

Khatla Kohhran Biak-ina Synod Inkhawmpui neih mekah nimin khan rorel inkhawm chhun-zawm a ni a; Presbytery pariat aṭanga eirukna leh hlem­hlêtna (corruption) chungchanga hmalak rawtna chu pawm a ni. "Corruption do hi thil pawimawh tak a ni a, kohhranin kan kalpui mek dan aia chak leh ṭhain bawhzui se la, SEC (Synod Executive Committee)-in lo bawhzui rawh se," an ti.

Synod Inkhawmpui chuan, ram hruaitute khalh ngîl tura Synod-in tun aia chak zawka hma a lak rawtna an pawm a, "Tun aia chaka hmalak ni se," tiin, SEC bawhzui turin an dah. 'Kan ram leh hnam siamṭhatna turin khawtlang leh ram hmasawnna hna thawktute'n rinawm leh dik taka hna an thawh theih nan Synod-in hma la rawh se,' tih rawtna an pawm a; "Synod Social Front hmalak mekna a ni a, thil pawimawh tak a nih avangin tun aia nasa zawkin hmalak ni se," an ti a, SEC bawhzui turin an dah.

Thil zawrh leh hralhah bûkna leh tehna dik tak hman chung­chang pawh thil pawimawh takah ngaiin Synod Inkhawmpui chuan, 'Kohhran (tualchhung kohhran) tinah ṭhahnemngai takin bawhzui ni se,' an ti. Mizo mipa thi tam lutuk a ziaawm theih nan Synod anga hmalak an rél a, SEC bawhzui turin an dah.

Synod Inkhawmpui chuan, Krismas leh kumthar vuakvêta halpuah leh puak thei thil khap chungchangah hmalak ṭha an ti a; kohhran tinah hmalak a nih theih nan ngenna siam turin Synod Secretary an ruat. Nau piang an pun theihna tura hmalak chung­chang pawh an pawm a, pastor bial leh tualchhung kohhran­ah uar zawka inzirtir an rél a ni.

Kumina Synod rorelah hian general agenda 42 a awm a, nimin thleng khan agenda 21 an ngaihtuah tawh a, vawiin leh naktukah rorel chhunzawm a ni ang. General agenda bakah, Pastoral leh SEC/Board aṭanga thu lut ngaihtuah tur eng emaw zat a awm bawk.