Dawrpui-in mipui himna tur an ruahman

Dawrpui Local Council chuan kumin Krismas leh 2018 kum thar vuakveta mipui tana awlsam leh himna tur kawng hrang hrangin an ruahman a; New Narket, Zion Street leh Electric Veng/Lower Zarkawt lam aṭanga New Market-a lut chhuak turte chu mahni veilamah zel kal turin an ngen.

Dawrpui LC chuan, tlai lama bazarpui kawng kam vela sale ṭhinte chu mipui harsatna a thlen tlem zawk nan tlai dar 5:30 hmaa an thil zawrhte sale lo turin an ngen a; mahni thil zawrh faka aurinna leh tape rocorder hman ṭhinin mi dang tan bengchheng a siam ṭhin avangin, mahni thil zawrh fak nan aurinna hmang lo turin sumdawngte an chah.

Dawrpui Veng huam chhunga kea kalna (footpath)-ah thil mah zawrh phal a ni lo tih sawiin Dawrpui LC hotute chuan, dawr neitute pawh an dawr kawngka pêla footpath rin chhana dawhkân leh bungrua hûng chhuak lo turin an hriattir a ni.

Zion Street aṭanga New Market luh thlâkna kawng laiah chawhmeh zuarte ṭhu tawh lo se an duh thu an sawi a; chutih rualin, Krismas leh kumthar vuakvetah erawh chuan Zirtawpni zan aṭanga a tuk Inrinni zing dar 9:30 thlengin mahni thlai thar zuar ṭhinte chu ngaihhnathiam ni se, an ti.

Dawrpui veng chhunga footpath hrang hrangah lirthei, a bikin two wheeler hûng/dah an awm ṭhin tih sawiin Dawrpui LC hotute chuan, "Hei hian kea kalte harsatna a siam nasa a, traffic police lamin min en ngunsak se kan duh khawp mai," an ti.

Dawrpui veng hian kumin November thla laihâwl atang khan an veng huam chhunga duty turin private security an ruai tih sawiin Dawpui LC chairman Zosangzuali chuan, private security chu LC bakah, an venga tlawmngai pawl dangte nen ṭangrualin an ruai tih a sawi a, "Dawrpui School building-ah office neiin chhun zan zawmin an duty a, bazara harsatna tawk tan eng lai pawhin pan theih an ni," a ti.

Dawrpui LC Chairman chuan, Krismas leh kum thar vuakveta mipui himna atana an ruahmanna hrang hrangte chu zâwm hrâm hrâm turin mi tin an ngen a ni.