Hâlpuah leh hâlmawi khapna kenkawh tum

YMA sub-headquarters, Lunglei hruaitute leh Lunglei khawpuia YMA branch hrang hrang hruaitute chu December 8, Zirtawpni zan khan YMA confedrence hall-a ṭhukhawm chuan Lung­lei mipuiin boruak muanawm tak hnuaia Krismas leh kum thar an lawm theih dan tur an sawiho a; hâlpuah leh hâlmawi khapte chu khauh taka kenkawh an rêl.

Meeting hi YMA sub-hqrs. Lunglei president R Lalnunthara'n a kaihruai a; a bika an sawm, Lunglei SP J Lalṭhafamkima'n thu sawiin, police-in hma an lak dan a sawi a, boruak muanawm tak hnuaia mipuite'n hunpui an hman theih nan thawhpuiah a sáwm a ni.

Lunglei YMA Resolution
1. Sum leh pai ṭul loa khawhralna, hriselna tichhe thei, Kristian sakhua nena inzawmna nei hauh lo hâlpuah leh hâlmawi chi hrang hrang hâl leh silai lem a mu nei chi hrang hrang zawrh, sorkarin Krismas leh kumthar lawmna vuakveta a khap hi Branch tinah a hlawh­tlin theih nan veng chhung tlangauna hmanga puanzar mai bakah, a zau thei ang bera veng chhung chanchinbuahte puanzar ni se, a vil hna taima taka thawh tlan ni bawk se.
2. Kohhran, chhungkua leh mimal tinin kan ngaihhlut em em Krismas leh kumthar lawmna hi hlim leh him taka kan hman theih nan YMA branch tinin duty post siamin, mipuite thlamuan turin hawihhâwm tak leh nêlawm takin i duty ang u.
3. Krismas leh kumthar vuakvetah hian lirthei chetsualna a thleng fo tawh ṭhin a; kum­inah hian chetsual theihna lak ata kan him tlan theih nan lirthei tlân chak lutuk leh thâwm bengchhengte khauh zawka ven ni se.
4. Rawlthar leh tleirawl hawklak boruak sosan avangin kan hunpuiah hian buaina tenau hriat tur a awm ṭhin a; hetiang thil a lo thlenga awm palh a nih pawhin, YMA branch hruaitute inberemin a khap daih dan zawn vat ṭhin ni se.
5. YMA branch hruaitute inpawhna leh thawhhona hi a pawimawh em em a, mi awm ṭha duh lo leh awm herhte zilh chungchangah a ṭul anga inhriattir tawn a, inpuih tawn ṭhin ni se.