KHAWTHLIR

Press Tour report
Kumin November thla chhung leh December thla tîr thlenga IPR department-in chanchinbumite tana NEDP Press Tour an buatsaihah, vawiin chawhma dar 11:30 hian Aizawl Press Club-ah report pek inkhawm buatsaih a ni dawn a, MJA member-te tel vek tura beisei an ni. Press Tour-ah hian press mite'n Uttarakhand, Rajasthan, Gujarat leh Himachal Pradesh an tlawh a ni.

Thisen pe
Electric Veng Bial KṬP chuan December 9, Inrinni khan Synod Hospital tan thisen unit 35 an pe a, a petute mipa 30 leh hmeichhia panga an ni. Inrinni vek khan New Serchhip Bial KṬP pawhin Serchhip District Hospital tan thisen an pe bawk.

Chawlhbuk tifai
Mizo Zirlai Pawl (MZP) chuan December 9, Inrinni khan Borapansuri khuaa Zofate Chawlhbuk an sak leh a chhehvel tihfai hnatlang an nei a; Aizawl aṭangin MZP president L Ramdinliana Renthlei leh member eng emaw zat an kal. MZP-te hian dan loa khaw din nia an hriatte an enfiah nghal bawk.

Theatre hawng
MJA president Vanlalrema Vantawl chuan, December 8, Zirtawpni khan Falkland Venga DM Theatre din thar a hawng. DM Theatre-ah hian ṭum khatah mi 140 an ṭhu thei a ni.

V/C inthlak
Serchhip district-a Lungchhuan khuaa ṭangrual V/C, MPC, ZNP leh MNF-te'n an siam chu December 8, Zirtawpni khan Congress party-ah an lut a, hei vang hian Lungchhuan khuaah hian Congress party kaihhruai V/C a ding thar.

Heroin man
YMA sub-headquarters, Serchhip hnuaia Anti Drugs Squad leh Serchhip Police ṭangkawp chuan December 9, Inrinni zing dar 7:30 vel khan Chhiahtlang Hmarvengah heroin gram 4.5 an man a, a neitua puh Lalruatfela s/o H Lianhnuna, Serchhip Bazar nia insawi leh Vicky Lalhruaitluanga s/o David Lalrinawma, Serchhip Venglai nia insawite an man tel nghal.