No Tolerance Drive ṭan a ni Mipui him nan lirthei enfiah ṭhin dawn

Aizawl Traffic Police leh Transport department-a enforce­ment staff-te chuan nimin zing aṭang khan ngaihnathiamna tel loa lirthei enfiahna, No Tolerance Drive an kalpui ṭan a, Dawrpui pheiah DIG Joseph Lalchhuana'n a hawng. Hetih lai hian, nimina Aizawla police hotute ṭhukhawm chuan, mipui himna tur leh râlmuang taka hunpui an hman theih dan turin lirthei veivâk, a bikin zan lamah enfiah a, rûi chunga lirthei khalhte chu a na thei ang bera hrem an rêl.

No Tolerance Drive hawn inkhawm hi Traffic SP C Lalthan­mawia'n a kaihruai a; DIG Joseph Lalchhuana chuan, lirthei khalhtute chu an lirthei khalh a him leh him loh te, dan laa lirthei khalh an nih leh nih lohte inhre chiang a, dan bawhchhe chunga lirthei khalh lo turin a chah a, "Dan zâwm kim veka khalh an nih pawhin, mi dang tihpalh theihna lakah leh min an tihpalh theihna tur lakah fimkhur a pawimawh," a ti.

Traffic SP chuan, Krismas leh kum thar mi tinin dam leh hlim tlang taka an hman theih nan Aizawl khawpui chhung remchang laiah dan bawhchhia, a bikin zu rûi chunga lirthei khalh, zial zu chung leh mobile phone hmang chunga lirthei khalh, phur rit lutuk, lirthei chak lutuka khalh leh document fel leh fel lo an enfiah dawn tih a sawi.

Traffic Police-te hian kumin January aṭanga November thla thleng khan dan bawhchhiaa lirthei khalh mi 12,043 an man a, chu'ng zinga 7,367 chu two wheeler khalh an ni. Nimin bikah chuan lirthei dan zâwm lo 90 vel an man a ni.

Hetih lai hian, Aizawl SP Neih­chungnunga leh police officer-te chuan nimin khan Aizawl SP pisa conference hall-ah kumin Krismas leh 2018 kum thar hman turah mipui himna tur leh râlmuang taka hman theih dan tur an sawiho a; lirthei veivâk, a bikin zan lamah enfiah ṭhin an rel a, rûi chunga lirthei khalhte chu a na thei ang bera hrem ni se, an ti.

Meeting hi Aizawl SP Neih­chungnunga'n a kaihruai a, Aizawl district additional SP pahnih, Aizawl North leh South SDPO leh Aizawla police station-a officer-te an tel a ni.

Meeting-a an thurelte
1. Lirthei veivâk, a bikin zan lamah check ṭhin tum a ni a, rûi chunga lirthei khalhte chu a na thei ang bera hrem tum a ni. Hei bakah hian, foot patrolling ngawrh taka kalpui tur a ni.
2. Krismas bazar hun laiin mamawhte tana pan awlsam turin Aizawl Bazarpui hmun pathumah Police Help Desk dah ni se.
3. Aizawl khawpui dai kawngpui dungte sawi lâwk awm loa check thut thut ṭhin ni rawh se. Vantlang hmuna zuin emaw, bengchheng siam emawte chu dan anga na taka hrem tur a ni.
4. Zin mite tan him zawkna a nih theihna turin passenger phur motor leh driver-te check ṭhin ni se, maxicab/bus counter-te pawh passenger list chiang taka record nei turin hriattir ni rawh se.
5. Hâlpuah lam chi leh silai lem, a mu kâp chhuak thei zuar leh nei check kalpui mekah, ngawrh taka chhunzawm zel tur a ni.