Police-in silai lem man vangin mi pariat thubuai an siam sak

Mizoram sorkarin kumin Krismas leh 2018 kum thar vuakveta hâlpuah leh hâlmawi hâl leh silai lem, a mu kâp chhuak thei a khap chu police-in an bawhzuinaah silai lem man vangin Aizawl district-ah mi pariat thubuai an siamsak tawh. Sorkar thupek hi a hlawhtlin theih nan district hrang hrangah police leh YMA-in ṭan an la mek.

Aizawl SP Neihchungnunga chuan, silai lem vangin thubuai pariat ziah luh a ni tawh tih sawiin, hâlpuah leh hâlmawi erawh man an la nei loh thu a sawi a; police station tinin theihtawp an chhuah mek tih sawiin, "DC-in khapna a siam anga mante hi IPC Section 188 hmangin Rs. 1,000 chawi leh thla ruk tàn theih a ni a, Kristian kan nih angin hunpuiah hian hâlpuah ri miah lo se kan duh," a ti.

Aizawl SP-in Vanglaini palai a hrilh danin, Aizawl Police Station hnuaiah silai lem, a mû kâp chhuak thei 209 man a ni tawh a, chumi kaihhnawihah chuan mi pali thubuai siamsak an ni tawh. Vaivakawn PS hnuaiah silai lem 40 vel man tawhin, mi pali thubuai siamsak tawh an ni.

Neihchungnunga chuan, Home minister R Lalzirliana'n mahni in chunga hâlpuah hâl a, inkalh khum chíng an awm nia a sawi pawh bawhzui an tum thu leh, halpuah hâlna in neitute chu hrem ngei an tum thu a sawi bawk.

CYMA president Vanlalruata chuan, hâlpuah, hâlmawi leh silai lem khapna thupek bawhzui turin YMA branch zawng zawngah lehkha an thawn tawh thu sawiin, "December 14 zanah Aizawla YMA branch hruaitute koh khawm kan tum," a ti a; sorkarin a ngenna piah lamah, YMA-in a tih tur hrim hrima an ngaih thu a sawi.

Vanlalruata chuan, hâlpuah, hâl­mawi leh silai lem, a mu kap chhuak thei khap chu YMA-in tihhlawh­tlin an tum a, kum dang aia chak zawka hmalak an tum thu sawiin, "YMA branch, group leh sub-headquar­ters zawng zawng khapna tihlawhting tura ṭan la turin kan ngen a, theihtawp kan chhuah chuan kan hneh ngei kan ring," a ti a; mi tinte chu ṭhenawm khawvengte tana bengchheng siam lo turin a ngen a ni.

School Education director K Lal­thawm­­mawia chuan, hâlpuah, hâlmawi chi hrang hrang leh silai lem, a mû kâp chhuak theite chu sorkar khap a nih avangin zirlai leh zirna-in thawktu reng reng an inhnamhnawih tur a ni lo tih hriattirna November 24, 2017-ah a chhuah.

School Education Director chuan, hâlpuah leh hâlmawi khûin boruak a tihbawlhhlawh thu te, silai lemin piansualna a thlen theih thute chu zirlaite hnena zirtir turin zirtirtute a chah.

General Administration depart­ment (GAD) pawhin sorkar hnathawkte zawm tur thuchhuah siam an tum mek a, an buaipui mek nia thu dawn a ni.

Mizoram Pollution Control Board (MPCB) member secretary C Lalduh­awma chuan, Krismas leh kum thar vuakvêta hâlpuah hâlin hriselna a nghawng thu leh thihna hial a thlen tawh thu a sawi a; MPCB-in hâlpuah hâl kum leh hâl loh kuma hriselna a nghawng dan an zir chian tawh thu sawiin, "Hâlpuah hâl nasat kum, kum thar a lo thlenin ashtma vanga thi an tam phah a, damdawi-ina lut pawh an tam phah ngei a ni," a ti.

C Lalduhawma chuan, khua a vawh laiin vansang lam aṭangin boruak bawlhhlawh lei lamah a chhuk ziah avangin hâlpuah khûin boruak bawlh­hlawh a siam belh nasat thu a sawi a; halpuahah túr (chemical) hlauhawm tak tak a awm thu leh hâlpuah khûin chuap, kal leh Alzheimer natna a thlen theih thu a sawi bawk.