Minister-in ráltlânte tan Rs. 2,00,000 pe

Myanmar sipai leh rakan Army-te inkah vanga Zo hnahthlak Mizorama rawn raltlan mek zat chu mi 1,359 an ni a, tun hnai bikah chuan a hlâwma luh belh an awm rih lo. Raltlante chhawmdawlna atan an awmna bialtu MLA, minister C Ngunlianchunga'n Rs. 2,00,000 a thawh.

Myanmar aṭanga Zo hnahthlak Mizo­rama raltlante hi khaw pali - Hmawngbuchhuah, Laitlang, Zochachhuah leh Dumzautlangahte an awm a; khaw palia V/C president ṭheuhin an report danin, Hmawngbuchhuahah mi 284, Zochachhuahah mi 397, Laitlangah mi 443 leh Dumzautlangah mi 235 awm mekin, an vaiin 1,359 an ni.

Raltlante hi an luhna khuaa V/C leh khawtlang hruaitute'n an theih ang angin an buaipui zel a, an buh tharte pawh ral­tlante tan an thawh hlawm a ni. Sorkar aṭangin buhfai leh ṭanpuina dang awm theite pek a ni tawh bawk.

Minister C Ngunlian­chunga'n Rs. 2,00,000 a pek hi khaw palia raltlante chhawmdawlna tur a ni a, a MLA fund aṭangin a pe a; a pawisa pek hmanga inhlawhna leh an dinhmunte zir chiang turin Lai District Congress Committee aṭangin hruaitu pathum a tir a ni.