NGO thawhpui thei sorkar din A nghahhlelh awm - Lalduhoma

ZNP president Lalduhoma chuan, dan loa ram dang mi (foreigner) Mizorama lut rute hnawhchhuah an nih theihna atana tlawmngai pawlte nena thawkho thei tur sorkar din a nghahhlelh thu a sawi.

Lalduhoma hian nimin khan an pisaa inkhawmah thu sawiin, "Tunlai hian kum 2015-a hawn tawh Borapansuri-a Zofate Chawlhbûk chu MZP hruaitute'n tuaihnûm thar lehin, chumi pah chuan dan kalha foreigner lo lutte'n khua an dinte a hmunah an enfiah a, village council member-te leh Young Chakma Association hruaitute hmaichhana an va hmachhawn hi fakawm kan ti a, kan salute a ni," a ti.

Dan kalha Mizorama ram dang mi lut rute hnawtchhuak tura NGO-te'n sorkar laipui leh state sorkar an nawr reng chung pawhin Chakma-te vote ît vangin sorkarin kut a kuangkuah tlat nia sawiin Duhoma chuan, "Sorkarin kut a kuangkuah tlat laia zirlaite an che reng hi thlamuanthlak a ni," a ti a; NGO-te nena hma laho thei tur ṭang­rual sorkar din hlan nghahhlelhawm a tih thu a sawi.

Lalduhoma chuan, Mizoramin industry sector aṭanga GSDP-a a thawh chhuah chu 21.10% chauh a ni tih sawiin, "Tun thleng thlenga ‘No Industrial State’ tih kan la ni reng mai hi a zahthlak tak zet. Industry lama hma kan sawn theihna turin Central sorkar hian a bik takin min dâwmkânna turin ruahmanna min siamsak a, chu'ng ruahmannate chu kan en chuan, Mizoram chu industry dinna atana hmun duhawm ber a tling hial a ni," a ti.

ZNP President chuan, Zoram Peoples' Movement (ZPM)-in ṭhalai hna hmu lote an lainat tak zet tih sawiin, "Human resource development hi chak taka kalpui kan tum. Ṭangrual sorkar chu guarantor-ah ṭangin, bul ṭanna nei lote chu ‘Bána kaih policy’ hmangin a dâwm kâng dawn a ni," a ti a; ṭhalai rual, beidawng mekte chu tute vanga beidawng nge an nih hria a, beiseina thar nen ZPM kut tichak turin a sáwm a ni.