PWD-in kawng siam dan an sawifiah
PWD chuan thuchhuah siamin, NH-54, Zemabawk-Tuirial inkar kawngpui siam mek a nih dan an sawifiah a; kawng siam chu a nih dan tur ang taka siam niin an tarlang.
PWD chuan, pawl ṭhenkhatin Zemabawk-Tuirial kawng siam mek an endik thu tarlangin, "A nih dana siam a nih loh vanga hlêp tam hle dawna an hriat thu a chhuak nual a. Henga thu ziaktute hian hna thawh dan tura ruahman (specification) an hriat chian loh vang a ni a, alkatra chhah lam pawh a nih dan tur dik taka thawh a ni," an ti.
PWD tarlan danin, kawng siam mek hi kawng thar anga a hnuai lam aṭanga phah ṭhat vek tur a ni lo a, hunbi neia thawm ṭhat leh hna thawh a ni. Kawng khuar chhe lai hnawh phui a, blacktop-a thawm ṭhat leh chu kawng neitu, Ministry of Road Transport & Highways (MoRTH) lamin sum a pek dan a ni.
Kawng siamna atana sum hmuh cheng nuai 1966.39-ah contract agreement chu nuai 1791.77 a ni a, chuvang chuan sanction amount zawng zawng contractor hnena pek vek tur anga chhût tur a ni lo. Khaw chhung kawng zau zawng pawh metre 7-a zau tura tih ni mah se, an siam tak chu a ṭhenah chuan metre 9-11 inkarte a ni a, hmun ṭhenkhatah metre 7 tling lo a awm bawk.
Kawng siamna atana tender tihfel hnuah Zemabawk dai aṭanga NH-54 tawpna, Tuipang (Siaha district) thlengin NHIDCL-in double lane-a lai turin tender a chhuah tawh tih hriat a nih avangin, Zemabawk-Tuirial inkar thawm ṭhat hna thawh dan tur tihdanglam hret a ni.
Kawng pawimawh zual laiah chauh bituminous macadam (BM) milimetre 50 (inchi 2)-a chhah phah tura ruahman chu Ṭhuampui leh Zemabawk khaw chhungah a tluana phah a, a chungah bituminous concrete (BC) milimetre 30-a chhaha thuah leh vek turin ruahman a ni ta zawk a; nakkum lawka laih chhiat leh tur lamah chuan BC milimetre 30-a chhah chauh phah tura tih a ni.