Remna atan chanchinbumite’n an thawh hlâwk - IPR Director

Information & Public Relations department ruahman anga sorkarin chanchinbumite tana tun hnaia NEDP Press Study Tour thawh lia neih thlirletna leh sawihona inkhawm nimin khan Aizawl Press Club-ah neih a ni. IPR director Lalnithangi chuan, Mizoram buai laia remna a awm theih nan chanchinbumite’n an thawh hlâwk tih sawiin, chanchinbumite chu ram siamna kawngah mipui thinglung khalh ngiltu ni zel turin a chah.

Lalnithangi chuan, press tour atana rua­hmanna an siamte Pathian zarah a hlawhtling tih sawiin, lawm­awm a tih thu a sawi a; chanchinbumite’n ram siamṭhatna atana an thuziakte chu mipui thinlung khalh ngiltu a ni tih a taka a lan ṭhin thu sawiin, “State rálmuang ber leh remna hlawhtling ber neitu kan nih chhan pakhat chu chanchinbumite vang a ni,” a ti.

IPR Director chuan, rambuai laia remna a awm theihna tura chanchinbu thawh hlâwkzia chu tun hnuah sawi rîk a ni ta mang lo tih sawiin, “Sorkar, kohhran, tlawmngai pawl te, committee hrang hrangte an awm a, kha’ngte thu chhuak leh thil tih mipui hnena hrilh ṭhintu ber chu chanchinbumite an ni,” a ti bawk.

Press Study Tour report pek inkhawm hi MJA treasurer R Lalhmangaihzuala’n a kaihruai a; MJA president Vanlalrema Vantawl pawhin thu sawiin, Press Tour hlawhtling taka an neih theihna tura hma latu IPR department hotute chungah chanchinbumite an lawm tak zet thu a sawi.

IPR department hmalaknain November thla leh December thla tir lam khan NEDP Press Study Tour thawh li neih a ni a; chanchinbumite’n Uttarakhand, Rajasthan, Gujarat leh Himachal Pradesh-te an tlawh a ni. Nimina report pek inkhawmah hian state pali tour-a tel aiawh ṭheuhten an zin chanchin an sawi a ni.