Champhaia hunpui hman dan tur sawiho

Champhai mipuiin Krismas leh kum thar boruak muanawm taka an hman theih dan tur ngaihtuahin, nimin khan DC Vanlalngaihsaka hoin DC conference hall-ah sorkar thuneitute leh tlawmngai pawl hruaitute an ṭhukhawm.

DC Vanlalngaihsaka chuan, Krismas leh kum thar felfai taka hman a nih theih nan theihtawp chhuah turin meeting-a telte a sáwm a, "Hunpuiah boruak muan­awm leh ṭha tak a awm theih nan sorkar lama hotu te, mipui leh khawtlang hruaitute thawhho a ngai a ni," a ti.

Meeting chuan, kum danga lo tih ṭhin tawh angin YMA sub-headquarters, Champhai hnuaia YMA branch 25-te chu an huam chhung ṭheuha duty insiam tura tih a ni a; Excise & Narcotics department-te hmalaknain ruihhlo dona special drive neih an rel.

Home Minister thuchhuah bawhzuiin, hâlpuah/hâlmawi leh silai lem, a mu nei zawrh, kawl leh hman reng reng khap tlat ni se, an ti a; thupek zâwm lo chu thubuai siamsak zel an tum.

Hunpui chhungin kawngpui ṭha, kawlphetha leh tui hnianghnâr zawk a awm theih PWD, Power & Electricity leh PHE department-te'n hma la se, tih a ni a; lirthei chet vel dan a ziawm zawk theih nan ṭan la tura Traffic Police lam ngen an rêl.

Fire & Emergency Services chu engtik lai pawha che chhuak thei tura inring reng tura tih ni se, an ti a; damdawi-ina thawkte pawh hunpui laia intipalh an tam ṭhin avangin duty ṭha tak indah tura ngen ni se, an ti bawk.