KHAWTHLIR
Durtlang LC result
Aizawl Municipal Corporation hnuaia Durtlang Local Council member boral tawh hmun ruak hnawhkhahna tura December 8, 2017-a bye-election result chu puan a ni tawh a, INC candidate Lalmuankima a tling. Bye-election-ah voter awm zawng zawng 2,881 zinga 1,536-in vote an thlak a ni.
Fai zirtir
Siaha DTO chuan nimin khan DC conference hall-ah auto-rickshaw leh taxi khalhtute pualin faina chungchang zirtirna hun, Capacity Building Programme on Cleanliness for Auto-rickshaw and Taxi Drivers' an buatsaih a, bawlhhlawh bâwm an sem nghal a ni.
Naupang huaisen
Lalhmingmawii Rawite (Mahmingi) lehkhabu ziah, 'Naupang Huaisen' tih chu nimin khan Aizawl Press Club-ah tlangzarh a ni. Lehkhabu hi dawr hrang hrangah lei theih tura zawrh chhuah nghal a ni.
IKK-in inpumkhatna tur an pawm
Isua Krista Kohhran (IKK), chhinchhiahna atana Kraws sen hmangtute General Assembly vawi 50-na, December 7-10, 2017 chhunga Luangmual Kohhran biak-ina neih chuan, IKK kraws sen leh var hmangtute an inzawm khawm theih nana hmalak an rel.IKK (kraws sen) rorel inkhawm hi December 8 khan neih a ni a, agenda 10 an neihte an pawm vek a ni. IKK kraws sen leh kraws var chhinchhiahna hmangtute inpumkhatna tur agenda an pawm bakah, zirna lam leh sex education lamah hmalak an rel a; kum 2017-18 budget atan Rs. 1,73,47,000 an pawm.