Kuminah Aizawl hmun lûn laiah No Vehicle Zone kalpui dawn

Coordination Committee on Traffic Management hotute Home minister Lalchamliana kaihhruaia nimina Secretariat conference hall-a ṭhukhawm chuan, kumin December 23, 24 leh 31-ahte Aizawl khawpuia hmun lûn laiah No Vehicle Zone kalpui leh an rêl.

Coordination Committee chuan, Aizawl khawpuia Krismas leh kumthar vuakvêta traffic tâwt lutuk tur vênna atana hmalak dan tur an ngaihtuah a; kum danga lo tih tawh ṭhin angin, kumin December 23, 24 leh 31-ahte No Vehicle Zone kalpui leh an rel a, Traffic SP-in a ṭul angin hriattirna lo chhuah se, an ti.

Aizawla two wheeler taxi chungchangah, Aizawlah two wheeler taxi 3,294 a awm tawh thu tarlan a ni a; inrêlbàwlna fel zawk a awm theih nan leh traffic tâwt lutuk tihziaawm nan two wheeler taxi-te chu hlawm pathumah ṭhenin, January 1, 2023 aṭangin hlawm thuma intlân chhâwk turin an rêl a; State Transport Authority-in commercial vehicle-te hman man (rate) a bituk ang taka kalpui a nih theih nan nasa lehzualin STA-in hma la se, an ti.

Aizawl Traffic Management/Urban Transport chungchangah UDPA Minister kaihhruai thuneitu hlawm pakhat, Unified Urban Transport/Traffi c Management Authority awm se, a kaihhnawih hrang hrangte tel se, an ti. Dan ṭan chhanin an thuneihna leh tih tur mumal tak duan a, Aizawl khawpui traffic enkawl leh a kaihhnawih lian thamah thutlukna leh ruahmanna siam ṭhin se, an ti bawk.

Ṭhutkhawmah hian Home secretary H Lalengmawia, Aizawl bawrhsap Dr Lalhriatzuali Ralte, Aizawl SP C Lalruaia, Aizawl Municipal Corporation leh state sorkar department hrang hrang hotute an tel a ni.

Aizawl khawpuiah hian kum 2009 khan Krismas dawn hnaihah a vawi khatna atan Zodin Square leh Chanmari kâwn inkarah No Vehicle Zone kalpui a ni a; a hnu lamah pawh kalpui a ni ṭhin. Kum 2020 leh 2021-ah erawh chuan Covid-19 hripui léng avangin kalpui a ni lo.