Aizawlah SARAS Fair neih mek a n

Rural Development department leh Mizoram State Rural Livelihoods Mission (MzSRLM) chuan nimin khan Assembly Annexe conference hallah thingtlanga kut hnathawktu hmeichhiate kutchhuak zawrhna, Sale of Articles of Rural Artisans Society (SARAS) Fair vawi sarihnaan buatsaih a, RD minister Lalruatkima’n a hawng.

SARAS Fair hi December 17, 2022 thleng Multi Level Parking, Tuikual South-ah neih tur a ni a, self help group (SHG) member mi 200-te'n dawr an hawng a, food court siam a ni bawk.

Minister Lalruatkima chuan, sorkarin thingtlanga chêngte chawikanna tur scheme leh programme hrang hrang a ngai pawimawh tih sawiin, "Theihtawp chhuahin ruahmanna a duang zel. AGEY-te ruahmannain SHGte'n an châkkhai an lam nan te, damdawi-in an panna leh aneizawnna tihhmasawnna tur atan lirthei 48 vailiam a ni tawh," a ti.

MzSLM hnuaia SHG member-te tan Community Investment Fund (CIF) leh bank loan kaltlangin hmalakna kalpui mek a nih thu sawiin Minister chuan, "Kut hnathawh mai bakah, ṭhalaite tana kut themthiamna leh eizawnna pe thei turin DDUGKY kalpui mek a ni," a ti a; SHG member-te chu tunlai mila thiamna nei thei turin training leh hmanruate pek an nih thu a sawi.

SARAS Fair hawnnaah hian kum 2019-20 chhunga MZSRLM hnuaia RD block ṭha bera thlan - Reiek, West Phaileng leh Bunghmun block-te hnenah award hlan a ni a; lawmna dang chi hrang hrang sem a ni bawk.

Fair hawnnaah hian MLA pahnih - Dr ZR Thiamsanga leh Zothantluanga bakah, AMC deputy mayor R Thanglura te pawh an tel a ni.