ZPM kan sorkar chuan corruption a kimki dawn - ZPM Working President

ZPM working president K Sapdanga chuan, ZPM an sorkar chuan dan a lal ber dawn a, danin ro a rel dawn a, corruption a kimki dawn niin a sawi a; party ṭhenkhatin sum an sem hnem ber a nih pawhin, ZPM chuan thâ hman hnem ber an tum thu a sawi bawk.

K Sapdanga hian December 8, Ningani khan Kawlkulha vantlang inkhawmah thu sawiin, "ZPM a sorkar chuan dan a lal ber dawn. Danin ro a rél dawn a, dan a zalên ber ang a, corruption a kimki ber dawn. Chu chu ZPM chuan kan tiam a ni," a ti.

ZPM party-in inthlan atana an inbuatsaihnaah hlêprûkna dah 'nil' an tum thu sawiin Sapdanga chuan, "Tunlai hian hlêprûkna aia pawi tih kan hotute'n an nei a, chu chu thuhrûk a ni.

Mipuiin chhiah an pek tlingkhâwm hi a chabi kawltute’n an hlép rû mai ni loin an thukru duh a ni. Vantlang sum thuhrûk hi ZPM a sorkar hunah pawh lêt leh vek kan tum," a ti a, chu chu mihring thâin a theih loh pawhin court-in a ti thei tih a sawi.

K Sapdanga chuan, ZPM an sorkar a nih chuan thluaka sum lut an hnawt chhuak dawn tih sawiin, "Sum ni loin mipui kan buaipui dawn," a ti a; bá ringawta ram rorelna a ninawm thu sawiin, "Hei hi Kristian ram aṭanga hnawt bo turin kan party hi thawk rim ber nih kan tum," a ti.

ZPM Working President chuan, party ṭhenkhatte'n sum an sem hnem ber a nih pawhin ZPM chuan thâ hman hnem ber an tum tih a sawi a, " awk tam turin kan inzirtir a, sorkar kan tuaknaah pawh thatchhe tura inzirtir a, sum sem pawl leh taima tura inzirtira hna thawk tura infuihte kan indo dawn a ni," a ti.

'Last minute politics' pawh nuaibo an tum thu a sawi a; inthlan dawnah pâwl ṭhenkhatin ipte akin, thim hnuah vote an zawng ṭhin tih sawiin, "Hûm neiiin chibai an sem ṭhin. Min bialtu atan ram vei nge kan duh, vote thlak dawna sum sem thei tih ngaihtuah chungin vote thlak tur a ni a, rilru kan sên a ngai," a ti a; retheih chhunzawm zel nge an duh leh duh loh chhût ngun turin mipui a chah. 

Inkhawmah hian K Sapdanga'n ZPM zawm thar mi 200 a lâwm lut niin ZPM thuchhuah chuan a tarlang a; ZPM consultant F Rodingliana leh PAC member TBC Lalvenchhunga te pawhin thu an sawi a ni.