Congress party chuan a tihhlawhtlin ngei tur an sawi chhuak ṭhin - MPYCC

Mizoram Pradesh Youth Congress Committee (MPYCC) chuan thuchhuah siamin, Congress party chuan an tihhlawhtlin theih ngei leh an tih ngei tur an sawi chhuak ṭhin niin an tarlang.

MPYCC chuan, Student Self-Support Union (SSU) Gen.Hqrs-in Vision 2023 an buatsaiha Congress party aiawha telte'n party manifesto chungchang leh corruption tihbo dan tur chiang taka an sawi chhuak chu lawmawm an tih thu an tarlang a, "Congress party-in sorkar kan chan chuan kut hnathawktute ngaih pawimawh an nih tur thu Pu Lalsawta'n chiang taka a sawi hi ram mipui tan innghahna tlak a ni," an ti.

Congress ṭhalaite chuan, "Congress party chuan kan tihhlawhtlin ngei tur leh kan tih theih ngei tur chauh kan sawi ṭhin. Ṭhalaite'n eizawnna ngêlnghet kan neih theih nan inzirtirna leh ruahmanna pawh Pu Lalsawta ho hian buatsaih mek a ni," an ti a; ram economy siamṭhatna tura policy an duan pawh mi rinawm, taima leh tumruhte'n an hlawhtlinpui ngei theih nan ram pum huapa puanzar mek a nih thu an sawi.

MPYCC chuan, Vision 2023 programme-ah rorel lai MNF party an tel lo chu pawi an tih thu an sawi a, "Policy mumal an neih lohzia leh thu an lo tiam tawh tam takte tihhlawhtlin an la neih mang loh vanga mipui hmaa inlan ngam loah kan ngai," an ti.