Minister leh MLA zingah eirûknaa hmingchhiatna nei an awm lo - MNY

Mizo National Youth Front (MNYF) Headquarters hruaitute nimina Mizo Hnam Rûna ṭhukhawm chuan resolution an siam a; MNF sorkarin kum li hmel a hmuh dawn tawh hnuah pawh minister leh MLA zingah eirûkna leh hlemhlêtnaa hmingchhiatna nei an la awm lo nia sawiin lawmawm an tih thu an tarlang.

MNYF resolution chuan, "Mizorama political party zingah MNF aia hruaitu ṭha leh zui tlak nei an awm loh avangin kum 2023-a inthlanpui awm turah pawh Pu Zoramthanga kaihhruai MNF-in sorkarna a chang leh ngei dawn tih a lang chiang taah kan ngai," a ti a; MNF-a lut zel turin mipui an sáwm.

MNF ṭhalaite chuan, "Ramin sum leh paiah harsatna lian tak a tâwk chung pawha kut hnathawktu chhungkaw 1,50,000 chuang khai chhuahna tura SEDP kalpui chhoh zel a ni hi lawmawm kan ti," an ti a; sorkar laipuiin a remti lo chungin Myanmar leh Bangladesh aṭanga ráltlânte Mizoram sorkarin a dawngsawng nia sawiin, "Hei hian MNF chu Zo hnahthlak hnam zawng zawngte inpui leh belh tlak a nihzia a tilang chiang hleah kan ngai," an ti.

MNYF ṭhutkhawmah hian kum 1986 aṭanga MNYF president ni tawh mi 11 hnenah chawimawina an hlan a; MNYF president Dr L Thangmawia, MLA chuan, "MNF ṭhalaite'n hma kan lakna zawng zawngah tih fuh tâwk loh leh tih sual tamtak kan nei ang tih ka ring a, mi dang rilru kan tihnatna a awm a nih chuan ngaihdam ka dil a ni," a ti.