Laldenga thih hnuah lehkha ziak hmangin an bei - MNF Treasurer

MNF treasurer K Vanlalauva chuan, MNF dintu Laldenga dam laia lehkha ziak ngam loin a thih hnuah lehkha ziak hmangin an bei niin a sawi a; MNF-in hnam thuthlung a kennaah thuthang dik lo a darh ṭhin nia sawiin, fimkhur turin an party mite a chah.

K Vanlalauva hian nimin khan Mizo Hnam Runa inkhawmah thu sawiin, "Pu Laldenga dam laia lehkha ziak ngam si loin, a thih hnuah a nupui fanaute mittui titla turin Pu Laldenga beihna an ziak hlawm a. Pu Laldenga rin tâwk vanga hnam movement-a zui chhuak kan ni.

A dam laia lehkhabu ziak ngam si lo, a awm loh hnua ziakte hi mi dawihzep an ni," a ti. MNF-in hnam thuthlung a kennaah thuthang dik lo a darh ṭhin nia sawiin Vanlalauva chuan, "Kan hma inthlan awm turah pawh tam tak a lo lang leh dawn... Opposition-te'n kan CM chunamenloin an sawi chhia a ni," a ti a; tun aia nasain an la sawi dawn avangin fimkhur leh nghet taka awm turin an party mite a chah.

India sorkar leh MNF inbiak laia Mizoram MP Lalduhoma'n Parliament House-ah engmah a sawi ngai lo nia sawiin K Vanlalauva chuan, "A au chhuak lo reng reng tih tuna kan MPte'n document an dil chhuah aṭangin a lang. State dang MP-te au chhuahna thu chhiar tur a awm laia khatih laia MP Pu Lalduhoma a ngawi reng kha mak tih loh rual a ni lo," a ti.