MNF sorkar hnuaiah Mizote'n hnam anga an zahawmna an hloh zel - MPCC Gen.Secy

Congress party chuan nimin khan Congress Bhavan-ah political session an nei a; thusawitu Dr Lallianchhunga, MPCC general secretary chuan, MNF sorkar hnuaiah Mizote'n hnam anga an zahawmna an hloh zel thu a sawi. 

Dr Lallianchhunga chuan, ram, hnam leh sakhua a him loh ai chuan hmasawnna kawng zawh bawrh bawrh loh a him tih sawiin, "Congress sorkar khan hmasawnna kawng pawh fimkhur takin a zawh ṭhin. Khawvelah sorkar sawisêl bo an awm lo a, Congress sorkar khan sawiselna a tâwk lo thei bik lo.

Mahse, hmasawnna kan thlen chin hi kan hnam tana him chinah zel a ni," a ti. MNF MLA fel tak tak nia an hriatte chu CM Zoramthanga hnuaiah an ṭhatna leh felna ram tan an lantir thei lo tih sawiin Lallianchhunga chuan, "MNF MLA leh minister fel tak tak nia kan hriatte hian ngati nge leiba thanga tâng mek Mizoram sum leh pai dinhmun hi a chhung aṭanga siamṭhat an tum loh? A hun taka sorkar hnathawkte’n hlawh an la thei lo hi ngati nge a chhung aṭanga an sawisel ngam loh? Healthcare bill lak theih loh vanga chhungkaw tam tak rûm thâwm hi an hre lo em ni?" a ti a; talk show-ah MNF an inlan ngam tawh lo niin a sawi.