KHAWTHLIR

Eye camp buatsaih
National Health Mission hnuaia District Blindness Control Society, Mamit leh Eye Care Hospital, Aizawl chuan December 5-8, 2022 chhung khan Kawrthah damdawi-in (Community Health Centre)-ah Eye Camp an buatsaih a, mi 55-te mit naute pâw (cataract) an zai a ni.

Buhfai khulsak dawn
South Chawngtui khua chuan nimin khan an khaw kum 50-na, golden jubilee an lawm a; bialtu MLA minister Dr R Lalthangliana'n hmanpuiin, kumin December thla chhung chu a bial mipui tan ration card-a buhfai la zawng zawngte a khulhsak vek tur thu a puang. Jubilee lawmpui
nan Rs 50,000, oxygen concentrator leh dekchi lian a hlan bawk.

Mipui sáwm
PC party chuan International Anti Corruption Day pualin nimin khan an pisaah hun an hmang a, an president Vanlalruata chuan, Mizoram chu
corruption-in a tihbuai nasat avangin eirukna donaah ṭangrual turin Mizoram mipui, political party, kohhran, pawl hrang hrang a sáwm.

Law Commission thu
Mizoram State Law Commission chu nimin khan an chairman Lala Khobung kaihhruaiin a pisaah an ṭhukhawm a, ṭhutkhawm vawi 40-na a ni.  e Mizo Marriage, Divorce and Inheritance of Property Act, 2014 hman meka siamṭhat ngaite sawiho a ni a; rawtna an pawmte chu sorkarah thlen turin an ruahman a, rawtna ṭhenkhat chu zir zui zel turin an dah.

Kuhva phurh khap
Serchhip additional DC Lalmuansanga Ralte chuan, Serchhip district khaw hrang hrangah dan loin kuhva phur lirthei an kal ṭhin tih hriat a nih thu a tarlang a, "Serchhip district-ah khawi hmunah mah dan loa kuhva lak luh leh phurh phal a ni lo," tiin thupek a chhuah.

Thisen pe
NSS, GM Higher Secondary School unit, Champhai chuan nimin khan an sikul hall-ah thisen pek an huaihawt a, Champhai District Hospital tan thisen unit 82 an pe a, petute mipa 63 leh hmeichhia 19 an ni.