MBSE-in exam vil ṭha an chawimawi

Mizoram Board of School Education (MBSE) chuan, HSLC leh HSSLC exam vil tura an ruat ṭhin zinga mi sitting supervisor F Lalṭansanga chu hna a thawh ṭhat avangin nimin khan MBSE conference hall-ah chawimawina an hlan.

Chawimawina inkhawm hi MBSE secretary F Lianhming­thanga'n a kaihruai a; an hun hman­puitu, MBSE chairman kal chhuak Dr Lalchungnunga chuan, School Education department chu Sodom leh Gomora anga teh­khin hial ni mah se, F Lalṭan­sanga ang zirtirtu rinawm leh inpe zo tak mi 10 pawh awm se, depart­ment an chhanhim theih a rin thu a sawi.

MBSE Secretary sawi danin, Chawngte, Kamlanagar leh Nghalimlui-a MBSE hnuaia board exam neih ṭhinah thil felhlel awm deuha hriat a nih avangin Lunglei DEO-te nen inberáwnin, sitting supervisor atan Lunglei Zotlang High School-a zirtirtu F Lalṭansanga chu rawt a ni.

F Lalṭansanga hian exam chu a hmunah ṭhutchilhin, zirlaite exam laia entawn nasa lutuk ṭhin chu manin a khap thei a, zirlai tumah hnawt chhuak lo leh rilru tina loin exam felfai takin a neihpui a ni.

F Lalṭansanga sawi danin, kum 1986 vel aṭangin Arunachal Pradesh aṭanga lo kal SR Chakma chuan Kamalanagar-ah high school a din a, HSCL exam candidate-te fair lo taka exam dan a zirtir ṭhin. Chuvang chuan chu sikul chu Mizoram hmun hrang hrang aṭangin Chakma-te'n an pan khawm a, Chawngte-a sikul dang pawhin a tih dan chu an entawn vek a ni.

MBSE chuan F Lalṭansanga hnenah hian certifcate leh Rs. 10,000 an hlan.