MNF leh ZDF an thawk dûn dawn

MNF party leh Zoram Decentralisation Front (ZDF)-te chuan nimin khan MNF pisa, Mizo Hnam Rûnah sorkar kalphung thar ruahman puan chhuahna hun an hmang. MNF leh ZDF-te hi Assembly inthlan awm turah thawhho an tum nia thu dawn a ni.

MNF president Zo­ram­thanga chuan thu sawiin, thuneihna leh mawhphurhna sem zâi chu ram hmasawn tak tak nan a pawimawh tih sawiin, "MNF chuan ‘Deccentralisation of Power’ hi kum 2013 khan kan chhawp chhuak tawh a, kan sorkar loh avangin kan hmang thei lo. Pathian leh mipui zarah kan sorkar ngei ang a, a takin kan hmang thei tawh ang," a ti.

Zoramthanga chuan, sem tur emaw, thawh chhuah tur pawh ni se, sorkar laipui rin ringawt chuan hmasawn a har tih sawiin, "Zoram mal­sawmna hi kan ram leilung aṭanga inṭan tur a ni. Thuneihna sem zai hian economic field a target ber a ni," a ti a; party leh economic-ah thu­neihna sem zai dan tur an duan tawh leh ZDF-in an duan tawh chu a kal khawm dawn a, a takin a luang dawn niin a sawi.

Tun hmaa minister leh MLA-te hnenah contract hna te, sorkar hna chhetê tê leh silpauline dila inchuh ang sorkar a tibuai tawh dawn lo nia sawiin, "Decentralisation of power hian kan ram kalphung a tidanglam vek dawn a. Thawh tur leh tih tur hrang hrangte hi mimalah, village-ah leh district-ah a awm tawh ang a, mipui kutah thu­neihna leh hmasawnna a awm tawh dawn a ni," a ti.

ZDF Advisory Board chairman Rev. Liandawla chuan, ZDF chu political party a ni lo tih sawiin, Advisory Board-a mite chu pastor pension te, kohhran upa te, party hrang hranga mite, ram leh khawtlang vei intél khawm an nih thu a sawi a, "Kan thil tum tihlawhtling theitu chu eng party pawh ni se kan thawhpui thei," a ti a; kalphung thar thuneihna sem zâi chu MNF thil tum pawimawh a ni tih an hriatin, December 2, 2017-ah MNF office bearer-te nen an inrem tih a sawi.

Rev. Liandawla chuan, MLA candidate leh thil dang phût an nei lo tih sawiin, "MNF titling turin Zoram hmun hrang hrangah kan feh chhuak dawn a, thingtlang lam inrêlbâwlna ṭha, mipui leh sorkar inhlat lutukte siamṭhat a nih theih nan MNF vote turin mipui kan sáwm nghal a ni," a ti.