Saipum-in Tuirial HEP kawng an dang

Saipum khawtlang chuan Tuirial Hydro Electric Power Project siam a nih chungchanga Saipûm khawtlangin hamṭhatna neih an phûtte tihhlawhtlin a nih loh chuan Tuirial HEP chu hawn an remtih loh tur thu an puang.

Saipum All NGO Committee chairman R Lalchamliana'n nimina thuchhuah a siam danin, tun hnaia Saipum khua NGO hrang hrangte huaihawta mipui kalkhawm chuan, an thil phût chungchangah sorkar hotute nena inbiak fel a nih hma chuan Tuirial HEP panna kawngpuiah nimin tlai dar 3 aṭang khan lirthei reng reng tlân luh an remti lo a ni.

Saipum All NGO thuchhuah chuan, Tuirial HEP hawn theih tura sorkar hmalakna chu lawmawm an tih thu an tarlang a; chutih rualin, Project bul ṭan dawnah public hearing neih a ni lo a, NEEPCO-in hna an ṭan tawp nia sawiin, "Tunah hian Saipum mipuite eizawnna hrang hrangah harsatna min siam ta a, Saipum aṭanga km. 1 thlang lam zawng chu tuiin a chîm ta a, zangnadawmna pawh min pe zo duh lo a ni," an ti.

Saipum chu Tuirial HEP-in a khawih nasat ber khua a nih zangnadawmna, free electric back feed leh hamṭhatna awm thei hrang hrang an phûtte tihhlawhtlin a nih theih nan HEP chu Chief Minister-in a hmun ngeiah hawnsak se an duh thu an sawi a; mipui hamṭhatna tura an phutte tihhlawhtlin a nih phawt loh chuan hawng lo turin sorkar an ngen a ni.