Lunglei khawpui himna tur sawiho

Lunglei District MJA bultumin December 11, Thawhṭanni khan Krismas leh kum thar vuakveta Lunglei khawpui leh a chhehvel himna leh râlmuanna chungchanga district thuneitute hmalak dan Zomuan Park-ah sawiho a ni a; Lunglei High Powered Committee (HPC) vice chairman S Laldingliana, MLA-in a hmanpui.

Inkhawm hi Lung­lei MJA vice president Lal­tlanthanga'n a kaihruai a; S Laldingliana chuan, Lunglei khawpui himna chu sorkar department mal emaw, pawl pakhat emaw maiin a tih theih a ni lo tih a sawi a, "Thawhhona ṭha tak pawl hrang hrang leh department lamte'n an neih a ngai a, kan ṭanrual a, thawhhona ṭha kan neih chuan Lunglei khawpui hi rálmuang takin kan siam thei ang," a ti.

Lunglei SP J Lalṭhafamkima pawhin thu sawiin, "Hunpui lo thleng turah hian chak zawka police thuamṭhat a ni dawn a, lirthei tlân chak lutuk ven nan a danna (barricade) dah a ni ang," a ti a; ruih theih thil chung­changah Excise & Narcotics department nen thawhhona tur ṭha tak an duan tawh thu a sawi.

Meeting-ah hian DC aiawh, dan leh thupek kengkawhtute leh YMA hruaitute an tel a ni.