Mirethei awm lohna tura hmalakna thlirho

Ministry of Rural Development-in kum 2022-a mirethei awm lohna rama India siamna atan scheme a siam, Mission Antyodaya (Gram Samridhi Evam Swachhata Pakhwada) hnuaia hmalaknate chu nimin khan RD minister R Lalzirliana hoin Assembly conference hall-ah thlirho a ni.

RD Minister chuan, BPL chhungkuate tan a thlawna thil sem leh man man zawka thil hralh­te a awm ṭhin avangin mahni thawh chhuah ni lo hamṭhatna dawn pawi ti loa BPL nih duhna rilru a awm ṭhin thu a sawi a, "Hun kal zelah BPL chhungkua nih zah­thlakzia kan hre chho a, kan harh chhuak ta hi a lawmawm hle. Mission Antyodaya hi a hlawhtlin ngei ka beisei," a ti.

Mission hmalakna kengkawhtute zinga sûlsutu pawimawh ber pakhat chu BDO an nih thu sawiin R Lalzirliana chuan, "Rinawm leh ṭha­hnemngai taka hnathawh ṭhin hi a lawmawm. Mipui mamawh, a bikin mi harsate mamawh ngaih pawimawh zel tur a ni," a ti a; hmasawnna leh changkanna kawng zawh turin hriselna tel lo chuan a tluantling lo tih hriat a pawimawh thu a sawi.

Inkhawmah hian Gram Samridhi Evam Swachhata Pakhwada hman a nih chhunga hma la ṭha ber thlante hnenah lawmpuina thuziak leh pawisa hlan a ni a; pakhatna hnenah Rs. 50,000, pa­hnihna hnenah Rs. 30,000 leh pathumna hnenah Rs. 20,000 hlan a ni.

Lawmman dawngtute chu - district-ah pakhatna Serchhip leh pahnihna Lawngtlai an ni a; RD block-ah pakhatna East Lungdar, pahnihna Thingsulthliah leh pathumna Hnahthial leh Thingdawl an ni. Khuaah chuan Leng khua pakhatna a ni a, pahnihna Darlawng niin, pathumna chu Ailawng leh Rawpui an ni.

Mission Antyodaya hi sorkar laipuiin India ram chu mirethei awm tawh lohna ram a siam a tumna a ni a, hmalakna hmasa atan kum 2019 ral hma ngeiin ram puma thingtlang khaw 50,000 thlan chhuah chu BPL awm tawh lohnaa siam turin bul ṭan a ni. Mizoramah chuan RD department kaltlangin khaw 183-ah kalpui mek a ni.