KHAWTHLIR

February 8, Inrinni khan Tuipuiral Zirlai Pawl chuan an din champha vawi 34-na pualin Hrangbana College-ah blood donation camp an huaihawt a, Synod Hospital tan mipa 59 leh hmeichhia parukte'n thisen unit 65 an pe. MTP, Siaha Meisatla Branch pawhin Inrinni khan Saiha District Hospital tan thisen unit 21 an pe a, a petute mipa 19 leh hmeichhia pahnih an ni.

UPC (North East India) Aizawl East District hnuaia bial hrang hrangte chuan Feb­ruary 7, Zirtawpni zan aṭang khan inkhawmpui an hmang a, nizan khan a ṭiak. Inkhawmpuiah hian Inrinni kha niléng­in rorel inkhawm neih a ni a, nimin chawhnu inkhawmah sacramen an kîl hlawm. UPC (NEI) Aizawl East district 

chhungah pastor bial 30 a awm mek a ni.

Mizoram Presbyterian Kohhran Hmeichhia­te chuan February 7, Zirtawpni zan aṭanga pastor bial hrang hranga inkhawmpui an hman chu nizan khan a ṭiak. Inrinni khan Inkhawmpui Rorel neih a ni a, bial hrang hranga an rorel zingah, Mizoram Presbyterian Kohhran pumpui kaihhnawih thilte a tel a, chungte chu an hmunpui lama kal zel tura tih a ni. Nimin chawhnu inkhawmah Lalpa Zanriah Sakramen an kilho bawk.

Law & Judicial minister TJ Lalnuntluanga chuan February 8, Inrinni khan Champhai District Court awmna tur a enfiah. TJ Lalnuntluanga chuan judiciary chu mipui sorkar siam rama hmun pawimawh tak chang anih thu leh hmunhma pawimawh leh pan awlsam tak mamawh anih thu sawiin, "Cabinet meeting-in Champhai District Court  hmunhma tur ṭha tak a ruahmana, a lawmawm takzet a ni," a ti a court  nuam leh changtlung tak din tura chak taka hmalak a nih thu a sawi.

Tun hnai khan Zawlnuam leh Darlak khuaah sangha, ran dang leh thlai khawi dan pawh a hlawkna sangha khawitute zirtir an ni a, training hawngtu Zofishfed chairman F Lalnienga chuan sangha khawi lama ṭan lak nasat a ngaih thu sawiin, "Tih tak tak a kan tih chuan nasa takin hma kan sawnin, kan intodelh thei ang," a ti.