Aizawla miretheite tana in sak ; A luahtu tur hnenah sem a ni

Sorkar laipui scheme, Basic Services to Urban Poor (BSUP) hnuaia Lawi­pu, Aizawla mi re­thei­te tana in sak chu nimin khan a luahtu tura thlante'n pawtin, allotment sem nghal a ni a; nodal department - UDPA minis­ter Zodintluanga'n a hmanpui.

BSUP Housing Com­­plex-a in luah theih­te pawhna leh hlan­­na inkhawm hi UDPA secretary Dr C Vanlal­ramsanga'n a kaihruai a; UDPA minister Zodin­tluanga chuan, mi harsa zawkte'n lei rem an rah theih nan UDPA depart­ment-in programme hrang hrang an nei tih a sawi.

Zodintluanga chuan, hmasawnna leh mi harsa zawkte chawikanna atan UDPA department-in hna a thawk tih sawiin, Lawipu-a in sak luah turah duhsak bik an nei lo tih a sawi a, "A cheng turte'n an awmna tur an pawt hian duhsak zawng a awm lohzia a tilang. He hmuna cheng turte hian an duh chhung leh an thlahte thlengin an awm thei a, tihral phal a ni dawn lo thung," a ti.

In luah turin dilna hun hawn belh a nih thu sawiin Minister chuan, "BSUP Housing Complex hi an luah lut ang a, mi tam takin an dil belh dawn tih ka chiang. Vawiina kan allotment-a lo la kal lo pawh an awmna tur an la pawt leh thei zel dawn a ni," a ti a; Rangvamual leh Durtlanga BSUP Housing Complex pawh a luah duh tan dilna hun hawn ṭêp a nih thu a sawi.

Lawipu-a BSUP hnuaia Economically Weaker Section (EWS) Housing Complex sak nan hian cheng nuai 3,403 ruahman a ni a, sorkar laipuia Ministry of Housing and Urban Poverty Alleviation bul­tum niin, UDPA depart­ment chu nodal agency a ni. Hindustan Prefab Ltd., Delhi-in an sa a, November 29, 2009-ah sa ṭanin, March 31, 2016-ah an sa zo.

EWS Housing Com­plex-ah hian building (block) pathum awmin, in chhawng tin chu chhungkaw pali zel luah theih tura siam a ni a, a vaiin chhungkaw 408 luah theih tura siam a ni. Ruahtui dahkhawmna tur tuizem lian siam a nih bakah, in luah tur kaw tin tan litre 1,000 dawng tuizem pakhat zel dah a ni a; intihhlimna hmunte siam a ni bawk.