Ram dinchhuahna mipuiah a innghat - Finance Minister

Finance minister Lalsawta chuan, ram dinchhuahna chu ram leilung leh boruakah a innghat lo nia sawiin, "A mipuiah a innghat zawk a ni," a ti.

Hillsgate Weekly-in nimina Pachhunga University College seminar hall-a Mizoram Youth Summit 2017 an buatsaih an hmanpuinaah thu sawiin Lalsawta chuan, "Mizoram aia ram chhe zawk leh remchanna nei tlem zawk ram tam tak an ding chhuak a. Ram dinchhuahna chu a ram leilung leh boruakah a innghat lo a, a mipuiah a innghat zawk a ni," a ti a; Mizoram chu sik leh sa leh ram leilung chungchangah khawvelah awh ngawih ngawih bik tur nei lo khawpa malsawmna dawng a nih thu a sawi.

Finance Minister chuan, Mizoramin kawng tam takah hma a sawn mek zel thu sawiin, "Hmasawn zel hi lawmawm hle mah se, ram deh chhuah tihpunna leh eizawnna ngêlnghet siamna kawngah erawh pi leh pute hun laia kan kalphung, nung ṭawk ṭawk (subsistence level) nihna bak hi kan la pelh hleih theih loh avangin hmalakna tur tam tak kan la nei a ni," a ti.

Human resource development (education) chu state dangte aia Mizoram chung­chuan ṭhinna nia sawiin Lalsawta chuan, chu chuan chhungkaw tam tak chu sorkar hna thawkin eizawnna ngêlnghet a siamsak tih a sawi a, "Mahse, he eizawnna ngêlnghet tui­hna hi a kang chat tial tial a ni," a ti a; thiam leh taima filawr bik tlem tan erawh kawng a la inhawn zel thu a sawi.

Minister chuan ṭhalaite leh mi hausate an harh chhuak thar a, thingtlang lama chengte'n buh leh bâl, thei leh thlai, ranvulh leh kawng dangah tun aia tam zawk an dehchhuah a, chu mi hmanga company-te hîp luh a pawimawh tih sawiin, "Mizoram hi subsistence level aṭanga tâl chhuak a, market economy din­hmuna lut tura fehchhuah hi ṭhalaite'n tum se ka duh hle," a ti a; mamawh inṭâwm buatsaih chu sorkar tum tur a nih thu a sawi.

Finance Minister chuan, hma la turin sum lungkham hmasak ber ai chuan, ngaihtuahna ṭha neih a pawimawh zawk niin a sawi a, "Awlsam taka sum lak luh duhnain taimakna a hnawt bo ṭhin. Taimakna chu thil sawi mawi harsa mah se, mimal leh ram hmasawnna atan pawimawh si a ni," a ti a; ṭhalaite chu uluk taka ngaihtuahna hmang a, taimakna nena kal turin a chah.

Summit hi Hillsgate editor C Lalhriatpuia'n a kaihruai a, 'Ṭhalaite leh politics' tih te, 'Human resource development' tih leh, 'Act East Policy' tih thupui hmangin mithiamte'n thu an sawi a, sawiho nghal a ni.