Congress tlakchhiatna dár a ri - Zorama

MNF party chuan nimin khan an party president Zoramthanga hoin Thingdawl Chhimveng YMA Hall-ah 'MNF haw rûnpui leh lawm luh inkhawm' an hmang a; MNF President chuan thu sawiin, Congress tlakchhiatna dár leh MNF pàr chhuahna dár a ri niin a sawi.

Zoramthanga chuan, Congress party-in India ramah kum 60 deuh thaw ro an rêl tawh a, tunah erawh chuan MP 543 awmah MP 44 chauh an nei tawh a, state inthlan a piangah an tla zel niin a sawi a, "Tunah chuan Punjab, Karnataka, Himachal, Meghalaya leh Mizoram chauhah an sorkar tawh. Mizoram hi kan inthlan zawh hunah chuan state pakhat emaw, a tam berah state pahnih bakah sorkarna an siam tawh lo ang," a ti.

Rangvamual leh Phunchawngah zu zuar bél hnih khat an vuak chhiatsak laiin, ni tin truck ke 12 neiin zu an phur lut zut zut nia sawiin Zorama chuan, "Zu kan thih phah zawih zawih a, chhung tin kan rûmin kan ṭap a, kohhran pawh a ṭawngṭai báng lo," a ti a; Mizoram hmun tinah kawng a chhia a, hmasawnna a awm lo niin a sawi.

MNF President chuan, an party-in an sorkar hun­ah chhung tin hnenah Rs. 3,00,000 aia tlem lo leh a aia tam pawhin ṭanpuina an pek dawn thu a sawi a, "Chu mi aṭanga kum 4/5 hnuah chuan chhung tin sum lak luh nasa takin a pung ang a, sorkar hna inchuh luih luih a awm tawh lo ang. Hetih rual hian, kan sorkar laia kan tih fuh loh awmah ngaihdam ka dil a, kan sorkar hunah chuan engkim ti fuh thei turin hma kan la ang," a ti.

MNF thuchhuah chuan, nimina inkhawm­ah hian Zoramthanga'n party dangte aṭangin mi 385 chu MNF-ah a lawm lut niin a tarlang.