Inpekna thar nena thawk turin chah

Mizoram Health Multipurpose Service Association (HMSA) chuan nimin khan Chanmari YMA Hall-ah inkhawmpui an hmang a; khuallian, Health minister Lal Thanzara chuan, Health department-a thawkte chu inpekna thar nena thawk turin a chah.

HMSA inkhawmpui hi an president P Manliana'n a kaihruai a; Health Minister chuan, India Today-in state hrang hrangte hmasawnna an tehna, State of the States Report-ah nikum khan Mizoramin health sector-ah ‘Most Improved Small State’ lawmman a dawn thu a sawi a, "Kumin­ah erawh chuan state dang­in he dinhmun hi an chang a; he dinhmun hi kum tharah chan leh ngei theih nan Health department hnuaia thawk zawng zawngte inpekna thar nen thawk turin ka chah a ni," a ti.

Lal Thanzara chuan, mipui hriselna kaih­hnawih sorkar prog­ramme hrang hrangte hlawhtling taka kenkawh leh kalpui a, mipui hnena thlentu leh hrilhtute chu community health officer, health supervisor leh health worker-te an nih thu sawiin, "Khawtlang hrisel leh hrisel lo aṭangin hna an thawh ṭhat leh ṭhat loh a lang," a ti a; mahni bial chhunga damlo harsatna neite zawn chhuah chu tih tur pawimawh tak a nih thu a sawi.

Health Minister chuan, mipui hriselna chu sorkar ngaih pawimawh ber pakhat a nih avangin, kuminah pawh health worker 185 lak thar a nih thu a sawi a, "Hengte hi indaih lohna hmun leh thingtlang kilkhawr zawk, a mamawh ngawih ngawihtu tamna, health worker la awm lohna khuaahte post an ni dawn a, tidamtu an ni tih hre reng chunga missionary rilru púa hna thawh a pawimawh," a ti.

Inkhawm kaihruaitu HMSA President chuan, an inkhawmpui chu an member-te'n tel vek châk mah se, hna ṭulna avangin health worker eng emaw zat an telh theih loh thu a sawi.