Mizoram hmasawnna atan Prime Minister Lo dawnsawn ṭhat a pawimawh - Dr JV Hluna

BJP, Mizoram Pradesh president Dr JV Hluna chuan, December 16, 2017-a prime minister Narendra Modi lo zin tur chu Mizoram hmasawnna atan ṭha taka lo dawnsawn a pawimawm thu a sawi.

Dr JV Hluna hian nimin khan an pisaah thuthar thehdarhtute a kâwm a; Narendra Modi chu India mite khawvel hriata chawisangtu nia sawiin, "Prime Minister chhuanawm tak kan nei a, India hmasawnna atana a thawh nasatzia leh a thawh ṭhatzia pawh kan hria a ni. Min rawn tlawh tur hi hun tawitê official programme hmang turin a ni a, function buatsaihna Lammualah kal ṭheuh i tum ang u," a ti.

Ṭha taka Prime Minister lo dawnsawn chu Mizoram hmasawnna atan thil pawimawh tak a nih thu sawiin JV Hluna chuan, "Mizoram a tlawh vawi khatna tur a nih avangin min hmuh dan a pawimawh em em a, hei hi kan state hmasawnna tur pawh a ni. A lo kal leh châk theihna tura lo dawnsawn a pawimawh," a ti a; Lammualah mipui an tam loh chuan Mizoram a hmuh dan a dik loh a hlauhawm niin a sawi.

Mizoram BJP President chuan, Prime Minister lo kal hun tur chu sorkar chawlh a nih avangin, lo lawm turin university leh college zirlai leh sorkar hnathawk zawng zawngte kal ngei turin a sáwm a, "Mizoram sorkar hian a hnathawkte phei chu kal ngei tura a tih ngei kan beisei. NGO leh kohhran hruaitute ṭhutna tur ruahman turin sorkarah ngenna kan thlen tawh," a ti.

Saipum khawtlangin Tuirial Hydro Electric Power Project siam a nih chungchanga an khawtlangin hamṭhatna neih an phûtte tihhlawhtlin a nih loh chuan Tuirial HEP hawn an remtih loh chungchangah Dr JV Hluna chuan, "An harsatna chinfel hi state sorkar hna a ni. Keini pawhin theihtawp kan chhuahpui a, chinfel a nih theih nan hma kan la zel ang," a ti a; Saipum mipuite chu harsatna siam lo turin a ngen a ni.