NH-54 kawngpui chhia vangin Lirthei tangkhang leh tlu a tam
Tunlai hian Mizoram châk lâkna NH-54 kawngpui chu Bualpui leh Kawnpui inkarah te, Kawnpui-Khàmráng inkar leh Khàmráng-Buichali inkarah a chhe hle a; nimin thleng khan lirthei 300 chuang an tangkhan tawh bakah, kawng chhe laia lirthei tlu a awm fo ṭhin. NH-54 kawngpui hi National Highways and Infrastructure Development Corporation (NHIDCL) enkawl lai a ni.
Kawnpuia khawtlang hruaitu pakhat chuan, Kawnpui leh Bualpui inkar bika NH-54 kawngpui chhe zual lai bik chu hmun pathumah a awm thu a sawi a, "Bualpui khuaah te, Horticulture hmun bulah te, Seṭhawn RTP péng bulte hi a chhe lai a ni a, RTP péng bul báwr vel hi a chhe lai ber a ni," a ti.
Kawngpui chhia avang hian lirthei lian rit phurte an tlân tlang ngam lo a, July 29, Nilaini thleng khan truck 280 vel an tangkhang a, nimin lamah chuan truck 300 chuang an tangkhang tawh a, truck rit phur chauh ni loin, truck ruak, Kolasib lam pante leh lirthei tê chite pawh ṭhahnem tak an tangkhang bawk niin an sawi. Khualzin phur maxicab-te pawh an tlan ṭha ngam tawh lo a, Aizawl lamah leh Kolasib lama awmte an inbànlet ṭhin tih an sawi bawk.
Kawnpui khawtlang hruaitute chuan, contractor-in kawng siam hna an thawh ve reng thu sawiin, "Kawng chhe nasa laite chu lungin an hnawh a, mahse, lirthei tlân a awm reng avangin an thawk tak tak thei lo. Kan duh dan chuan, sorkar hian ni 2-3 vel lirthei tlantir lo se, chumi chhung chuan kawng chhe zual laite hi thawm ṭha se, a ṭhat kan ring," an ti.
Bualpui khaw mite pawhin an khua leh an khaw dái vela NH-54 kawngpui chu a chhe tak zet tih sawiin, lirthei rit phur chauh ni loin, truck ruakte pawh an tàn nasat thu an sawi. Kawng siamtute hna thawh dan chungchangah, "Motor an tàn nasat zualna lai tak hi chu motor tlân an awm ve reng avangin an thawk hlei thei lo. A chángin an khawih zuai a, an kalsan leh a, hmun dang, siam ṭul ngawih ngawih ni lo laite an khawih leh ṭhin bawk a," an ti a; kawng chhia chu lirthei leh mihringin harsatna an tawh nasat phah thu an sawi.
Khàmráng bul velah pawh NH-54 kawngpui a chhe nasa hle tih Khamrang khaw mite chuan Vanglaini an hrilh. Zawhna chhángin Khamrang khaw mite chuan, a khua aṭanga Kawnpui lamah hmun eng emaw zatah kawng chhe lai a awm thu leh, a chhe tam zawk chu an khua leh Buichali lei inkarah a nih thu an sawi.
Khàmráng mite chuan, nimin khan an khaw bul lawka kawng chhe laiah truck pakhat a tlûk thu sawiin, "Lirthei tlân tur a dang a, lirthei an tlang theih nan JCB hmangin a sir vel hâi mek (he thu ziah lai hian) a ni," an ti. Kawngpui viltu PWD Executive Engineer chuan Vanglaini zawhna chhángin, NH-54 kawngpui chu Lailapur aṭanga Sairang thleng NHIDCL-in an enkawl thu leh Mizoram PWD-in tih theih an neih rih loh thu a sawi.
PWD EE chuan, Lailapur-Silchar inkar kawng enkawlna (maintenance) atan PWD-ah sum an pek loh thu sawiin, "Keini'n sum dawn kan nei lo a, a enkawltu NHIDCL-in cheng nuai 1600 vel an dawng niin kan hria, a zat chiah kan hriatpui lo. An duh lai lai an tender a, an duh lai lai an bàn a, kawng ṭha lai Vairengte-Bilkhawthlir inkarte an tender leh daih bawk a," a ti.
PWD EE sawi danin, Lailapur-Sairang inkar hi NHIDCL-in hlawm/hmun pangaah an ṭhen a, hlawm khat chu C Lalhluna, Ramhlun an pe a, hlawm li chu JR Constructions an pe a ni.