KHAWTHLIR

Art Festival
Aizawl Art Festival, 2017 chu nimin khan Art Novelty, Chal­tlangah IPR director Lalnithangi'n a hawng. Aizawl Art Festival hian December 16, 2017 thleng a awh dawn a, mithiam kutchhuakte lei theih a nih dawn bakah, vawiin hian Festival pualin seminar buatsaih a ni ang. Festival-ah hian artist 45-te kut chhuak 71 pho chhuah a ni.

Literacy campaign
NULM, Serchhip leh Mizoram Rural Bank ṭangkawp chuan NULM hnuaia skill development training nei mekte tan financial literacy campaign an buatsaih. He hunah hian MRB manager John Lal­chhanhima Ralte chuan, sorkar laipuiin bank account neih ṭhat a ngai pawimawh tih sawiin, "Ram changkang tehna hmanrua chi khat a nih avangin keini pawhin bank account kan neih ngei a ṭul a ni," a ti.

Homestay training
NEDP hnuaia Tourism department hmalaknaa Champhai district-a Rural Homestay Scheme kalpui mekah thlenna in (homestay) neitu mi 25-te tan nimin khan Champhai Convention Centre-ah ni thum awh tur training buatsaih ṭan a ni a, Tourism director Biakthanmawia Pautu-in a hmanpui.

Hmalakna thlirho
Mamit District Consultative Committee (DCC) leh District Level Review Committee (DLRC) chu nimin khan district bawrhsap Lalbiaksangi hoin DC conference hall-ah an ṭhukhawm a; July-September, 2017 inkara district chhunga bank hrang hrangte hmalak­na leh hlawhtlinna an thlirho. Mamit DC chuan Potential Linked Credit Plan (PLP) 2018-19 chu a tlangzarh nghal a ni.

Ramri tlawh dawn
MJA, Serchhip district member pariatte chuan India leh Bangladesh inrînaa hmun pawimawhte tlawh turin nimin zing khan Serchhip chhuahsanin, tlaiah Tlabung an thleng. Serchhip MJA-te hi Serchhip aṭangin mi pasarih leh Thenzawl aṭangin mi pakhat an ni a, 159 BSF bultuma zin an ni.