Niminah Covid-19 vei dam tawh mi 19 chhuahtir an ni

July 29, Nilaini khan ZMC laboratory-ah Covid-19 hripui vei mi pathum hmuh chhuah a ni a, nimin khan hripui vei dam tawh mi 19 chhuahtir an ni thung. Mizorama Covid-19 vei hmuh chhuah tawh zat chu mi 398 an ni a, Vairengtea hnam dang sipai pakhat, Masimpur-a awm mek chu Assam record-ah telh a nih tâk avangin Mizorama hripui vei tawh zat chu 397-a chhiar a ni.

Nimin chawhma lam khan Lawngtlai district mi, Covid-19 vei vanga Covid Care Centre (CCC)-a enkawl mipa 11 chu an dam tawh avangin chhuahtir an ni a; Lawngtlai district-ah hian Covid-19 vei mi 22 hmuh a ni tawh a, mi 19 chhuak tawhin, enkawl mek mi pathum an la awm.Nimin chhun dar 12 vel khan Serchhipa Dedicated Covid Health Centre (DCHC)-a hripui vei enkawl mi pali - BSF mi pahnih, Assam Regiment leh Assam Rifles sipai pakhat ve vete chu an dam tawh avangin chhuahtir an ni. Pakhat erawh chu an ina chawlhkar khat chhung la inkhung hranna tur a awm ṭhat loh avangin DCHC-ah a la awm rih thung. Serchhip district-ah hian Covid-19 mi pasarihte an dam vek tawh.

Nimin vêk khan Aizawla CCC - Tribal Art Centre, Tanhril aṭangin mi pahnih - Assam Rifles leh National Disaster Reponse Force (NDRF) mi pakhat ve ve chhuahtir an ni a; SRH-ZMC aṭangin Assam Rifles sipai pakhat leh civil mi pakhat chhuahtir an ni bawk. Nimina chhuahtir zawng zawng chu mi 19 an ni.

Nilainia ZMC laboratory-a swab sample 157 endik aṭangin Covid-19 vei mi pathum, Aizawl district-a mi vek hmuh chhuah a ni a, mi 152-in hripui an kai lo. Negative zingah Covid-19 vei endik nawn mi 11 an tel a, mi pahnih an la positive laiin, pakua chu an negative tawh a, negative tawh mi pakuate hi an district hriat theih a ni rih lo. July 29-a Covid-19 vei hmuh chhuah thar pathumte chu mipa pakhat leh hmeichhia pahnih, kum 26-40 inkar mi an ni a, Bihar, Delhi leh Uttar Pradesh aṭanga hawte an ni. Quarantine facility-a awm lai an ni a, taksaah harsatna an nei lo (symptom lang lo).

Mizorama Covid-19 vei anga chhiar zinga mi, Counter Insurgency & Jungle Warfare School, Vairengtea sipai pakhat, Covid-19 vei chu Masimpur, Silchar-a Military Hospital-ah enkawl a nih avang leh hmuh chhuahna hmun pawh Assam a nih avangin Ministry of Health & Family Welfare remtihnain Assam record-ah sawn a ni a, Mizoram record-ah chhiar tel a ni tawh lo.

Sorkar thuchhuakte leh official-te sawi aṭanga hriat theih chinah, Mizorama Covid-19 vei hmuh tawh zat mi 397 zinga mi 242 chuan an vei tawh lo (negative tawh) a, mi 234 chu dam taka chhuahtir an ni tawh. Hripui vei mi 155 an la awm a ni.