Bawlhhlawh paih motor siamrem dawn

Aizawl khawpuia bawlhhlawh la khawma paihna tur motor, SIPMIU kaltlanga Mizoram sorkarin Aizawl Municipal Corporation (AMC) hnena a pek chu a ṭul dan azirin siam danglam a ni dawn.

AMC mayor PC Lalhmingthanga sawi danin, SIPMIU aṭanga bawlhhlawh paih motor an dawn 54 zinga 49 chu bawlhhlawh tam zawk phurh theihna turin a bang ft. khat leh a chanve vela tihsan a ni dawn a, chu chu bawhzui nghal a ni. Khawpui bawlhhlawhte hneh zawka paih a nih theih nan 407 truck panga leh pick-up pali hman belh tum a ni bawk a; chu'ngte chu bawlhhlawh paihtu contractor-te hnenah pek a ni ang.

Hetih lai hian, AMC chuan Aizawl khawpui chhung hmun pathum - Zarkawt, Kulikawn leh Tuikual South-a kawngpui sira bawlhhlawh chhêk khawmte chu an paih fai tawh a ni.

AMC Board of Councillors chu December 13, Nilaini khan an ṭhukhawm a; kum 2017-18 chhunga AMC sum hman tur Revised Estimate atan Rs. 62,02,37,000 an pawm. Sum an pawm tak hi Revised Estimate siam hmaa sum ruahman Rs.53,49,11,400 aiin Rs. 8,53,25,600-in a tam zawk a ni.

AMC BoC meeting-ah hian Aizawla local council-te hnatlang phatna, Rs. 50 ni ṭhin chu Rs. 100-ah an tisang a; hnatlang phatna pe lote rûnna Rs. 100 ni ṭhin pawh Rs. 200-ah an tisang bawk.