Kawng pêngṭhuam siam dan tur sawiho

UDPA minister Zodintluanga hoin nimin khan pisaah PWD, Power & Electricity, PHE, Traffic Police leh Aizawl Municipal Corporation (AMC) hotute'n Aizawl khawpui chhunga kawng pêngṭhuam siam ṭhat leh zauh dan tur an sawiho.

Meeting-ah hian Chaltlang North leh Bawngkawn inrìna, Sairang lam panna kawngpui péngṭhuam, lirthei intawh khawm tamna lai chu râwt hniam a, kawngpui zau zawk siam dan tur an ngaihtuah a ni.

Hemi chungchangah hian UDPA Minister chuan, ruahmanna thui tak kalpui a nih tawh thu leh PWD hotute pawhin plan leh drawing an ruahman tawh thu a sawi a, "Hei hi kan tih theih chuan Aizawl hmar lama mihring leh motor intawh khawm tamna chu nasa takin a tihziaawm beisei a ni," a ti.

Meeting-ah hian Khatla kâwn mipui tana nuam zawka siam dan tur te, Dawrpui Vengthar aṭanga Dinthar panna kawng pêng tih ṭhat dan tur te, Vaivakawn-Hunthar Veng pêng siamṭhat dan turte leh, Aizawl khawpui hmun hrang hrang siamṭhat theih tur awmte an sawiho bawk.

Hmun hrang hranga kawng pêngṭhuam siamṭhat chungchang bakah hian Aizawl khawpui chhung hmun hrang hranga kawngpui inkawhhmuhna (road direction sinage) siam tur ruahmanna thlirho a ni a; road sinage chu khawpuia mikhual zinte tan kawng inkawhhmuhna remchang a nih bakah, khawpui cheitu a nih thu an sawi.

Meeting chuan, Aizawl khawpui chhunga kawng pêngthuam siamṭhatna tur ruahmanna hrang hrangte chu kum thar veleha thawh ṭan a nih theih nan department hrang hrangte'n an ruahmanna neih tawhte siamṭhat leh ennawn ngai awmte chu siamṭhain, December 20, 2017 hmain UDPA Director-ah thehlut se, an ti.

Aizawl khawpui chhunga kawng pêngṭhuam siamṭhat hi UDPA bultumin department hrang hrangte thawkhoin kalpui tawh ṭhin a ni a, Vaivakawn junction leh Pángi pêngte siam a lo ni tawh a ni.