NYKS -in thu insawisiak inelna a buatsaih

Ministry of Youth Affairs & Sports hnuaia Nehru Yuva Kendra Sangathan (NYKS), Mizoram huaihawtin nimin khan Lunglei Press Club-ah ṭhalaite tana thu insawisiakna, 'State Level Declamation Contest' buatsaih a ni a, NYK state director SR Bishnoi-in a hmanpui.

SR Bishnoi chuan, intihsiaknaa telte chu ram leh hnam hruaitu an la nih dawn avangin lehkha zir piah lamah, mihring mihrinna tihhmasawn (personality development & communication skill) lama intuaihriam turin a chah a, "Kan ṭhalai rualte'n ram an hmangaih chuan hmasawnna chak tak kan nei thei dawn a ni," a ti.

Declamation Contest hi Republic Day 2018 puala ram pum huap ṭha­laite inelna tur a ni a, India ram state tinah block level, district level leh state level-ahte intihsiakna buatsaih a ni. Intihsiakna thupui chu, 'Patriotism and nation building' tih a ni a, ṭhalaite'n mahni ram hmangaihna rilru an put theih nan leh India ram hmasawnna kawnga rilru thar an put theihna atana hmalakna pakhat a ni.

Intihsiaknaah hian B Lalthlamuanpuia, Lawng­tlai district chu pakhat a ni a, Rs. 25,000 leh certifcate a dawn bakah, January 2018 chhunga neih tur India ram pum huap inelna National Level Declamation Contest-ah Mizoram aiawhin a tel ang.