Six Basic Needs hlen turin theihtawp Kan chhuah dawn - MPC President

MPC president Lalhmangaiha Sailo chuan, kum 2017 chhunga MPC party-in Pathian hruaina nasa tak an dawnah lawm­thu a sawi a, "Six Basic Needs hmanga Zoram thar din an beisei em em hlen chhuak turin theihtawp ka chhuah zel dawn a ni," a ti.

Nimina MPC-in an party pisa, kumin atana khârna inkhawm an buatsaihah thu sawiin Lal­hmangaiha Sailo chuan, an party tana ṭhahnem­ngai tak tak ṭhenkhat­in awm lohsan mah se, member thar duhawm tak tak ṭhahnem tak an neih zel thu a sawi a; "Kan party-ah beiseina lian tak an nei tih a chiang a, an rawn zawm hi an tisual lo ang," tiin, MPC party tluka Mizoram hmasawnna leh ṭhatna lama rorel thiam leh kalpui thiam an awm lo niin a sawi.

MPC President chuan, Brig. T Sailo kaihhruai PC sorkarin rahbi ṭha tak tak a siam tawhte chu a hnua sorkarna chelhtute'n an hman ṭangkai duh loh avangin Mizoram chuan tun thlengin retheihna a tuar niin a sawi a, "Governor Kohli-a pawhin 'Kutdawh hnam' min ti hial. Tuin nge kutdawh hnama min siamtu chu, Congress leh MNF sorkarte an ni," a ti. MPC dintu Brig. T Sailo hmathlir leh policy ṭhate chu an theih leh thiam ang tawkin an chhunzawm dawn tih a sawi a ni.

Lalhmangaiha Sailo chuan, kum 30 chhung rorelna inchelh chhâwkte hmalaknain duhthusam an phak loh lutuk avangin mipuiin roreltute ring zo loin mawhphurhnaah an la lo thei ta lo niin a sawi a, "Sorkarin a mawhphurhna leh a tih tur a tih tâwk loh vanga kohhran, YMA, MZP, NGO leh mimal hrang hrangte'n kawng tam takah ke an pên phah hi sorkar tan a mualphothlak hle a ni," a ti.

MPC President hian Mizoram mipuite Krismas leh kum thar hlim leh thlamuang taka hmang turin duhsakna a hlan a ni.