Mualcheng South-ah Páwl Kût hmang

Lunglei district-a Mualcheng South khua chuan nimin khan an khaw khelmualah Páwl Kût an hmang a, Lunglei High Powered Committee (HPC) vice chairman S Lalding­liana, MLA-in a hmanpui.

Kût hawnna inkhawm chu Mualcheng South YMA president Vanlal­thanga'n a kaihruai a; S Laldingliana chuan, Mualcheng South chu model village-a puan a nih angin, faina leh kawng hrang hrangah hmasawnna hmuh tur a awm thu a sawi a, "Mualcheng South khuain thlawhhma a lakna ber Thlisâm leh Fenbeh kawngte chu motor luh theih tura siam chhunzawm a ni ang," a ti.

Páwl Kût hmannaah hian Mizo hnam zai leh làm chi hrang hrang leh Mizo infiamna chi hrang hrang entir a ni a, khaw­tlang huapin kût ruai an ṭheh nghal a ni.