1st MAP khelmual thawm ṭhatna tur lungphùm phúm Budget páwn aṭangin hna kan thawk - Chief Minister

Chief minister Zoram­thanga chuan nimin khan Armed Venga 1st Bn. MAP playground thawm ṭhatna tur lungphùm a phúm a, cheng nuai 4635 sénga chei ṭhat tum a ni. Chief Minister chuan, Covid-19 vangin state budget-in a daih lo a, budget páwn lam aṭangin hna an thawh thu a sawi. 

Lungphûm phûm inkhawm hi chief secretary Lalnunmawia Chuaungo-in a kaihruai a; Zoramthanga chuan, Covid-19 in ram a tihbuai avangin Covid-19 dona, buhfai leina, tui pump chhuahna leh kawng siamna atan bâk kuminah state budget hman hleih theih a nih loh thu sawiin, "Central sorkarin a hmanna tur bik awm saa min pek hmangin hna kan thawk. Hengte hi thil dangah hman theih a ni lo," a ti.

Chief Minister chuan, politics-a inbeihna atana hmanga 'Chumi sum chu chuta tan chuan hman mai âwm' tite an awm thu sawiin, "Mipuiin thu dik hria se ka duh. Heng a hmanna tur ruahman saa sum lo kalte hi central chuan tender chhuah zung zung a, hnathawh zung zung an duh a ni," a ti a; Mizoram budget bikin hna thawhna a daih loh avangin, din khawchhuahna atan hman mek a nih thu a sawi.

CM Zoramthanga chuan, nikum lam budget a hmanna tur tihfel vek tawhte chu thil dang atana pawhpên chi a ni lo tih sawiin, "Contract pek tawhte cancel sak an nih chuan court-ah min khing mai ang. Chumi khua/veng tana lo ruahman tawhte kan tidanglam a nih chuan a veng/khua an thinrim dawn lutuk, thil tih chi a ni lo. Sorkar kalphung hi hriat a ṭha," a ti.

A hmanna tur bik ruahman sa hnuaiah sorkar laipuiin cheng nuai 10,000 tél Mizoram an pe tawh nia sawiin Zoramthanga chuan, "Heng sum hmang hian a chak thei ang bera hmasawnna kalpui kan tum," a ti a; Covid-19 vanga hmasawnna hnathawh chawlhsan ngawt lo a, budget páwn aṭanga hmasawnna hna thawh an tum thu a sawi.