Champhai District Press Club hawn a ni
February 8, Inrinni khan minister of state TJ Lalnuntluanga'n Mizoram Journalist Association (MJA) Champhai MJA Press Club thar a hawng. Press Club hi Mizo pa chhiara chawng li niin, a dung ft. 55 leh a vâng ft, 26-a zau a ni a, cheng nuai 40 sénga sak a ni.
Minister TJ Lalnuntluanga chuan, Champhaiah Press Club thar hawn a ni ta chu lawmawm a tih thu sawiin, "Champhai tana hmalakna hrang hranga MJA-te'n min finchhuah ṭhin a, a lawmawm hle," a ti a; MJA-te chu sorkar thâ tichaktu leh khalh ngil thei pawl pawimawh tak an nih thu sawiin, an zahawmna chu mimal nunah thui tak a innghah avangin invawn leh nun uluk a ṭul thu a sawi.
MJA member-te chu mipui rilru sûkthlêk siamtu an nih thu sawiin Minister chuan, "Mizoram hi ram ṭhang leh hmasawn mek a nih avangin mipui rilru sûkthlêk her danglamna turin hriat zauna pek a ngai a, mipui zirtirna leh siamṭhatna lamte hrilh hnem tura ṭan lâk lehzual a ṭul," a ti a; MJA member-te chu anmahni ngei pên chhuak a, thu dik zîktluak mipui hriattir tum turin a chah.
TJ Lalnuntluanga chuan, Indo-Myanmar border trade chungchangah sorkar laipui dâwra hmalak zel a nih thu sawiin, "Immigration checkpost leh Land Custom Station aia lian zawk Integrated Check Post siam tuma hmalak zel a ni," a ti a; tun aṭanga rei lo têah Khawzawl-Champhai leh Seling-Champhai double lane-a siam turin chak taka buaipui a nih thu leh, Keifang-Kawlkulh inkar siam mek a nih thu a sawi.
Minister chuan, District Transport Office (DTO) awmnaah lirthei khu endikna (pollution test) khawl bun tum a nih thu te, Champhaiah Botanical Garden siam tum a nih thu te, Aizawl-Churachanpur, Aizawl-Jampui, Champhai-Tahan bus service siam tum a nih thute a sawi bawk.
Inrinni vêk khan MJA, Champhai district chuan Annual Conference an hmang a, Aizawl aṭangin MJA president Zonunsanga Khiangte leh hruaitu dangte'n an hmanpui. Kum 2020-2022 chhunga hruaitu tur an thlang nghal a; president atan Lalhmingmawia Pachuau, vice president atan Lalhlupuia leh treasurer atan Lalhmingliana te an thlang a ni.