Hausak thut duh vanga dik lo taka lakluh pawi tih lohna a langsar - Chief Minister

12th December, 2022

Zemabawk North Branch YMA chuan December 10, Inrinni khan an veng basketball court-ah an kum 25 (silver jubilee) tlin an lawm a, an hun hmanpuitu bialtu MLA Zoramthanga, chief minister chuan Mizoramah hausak thut duh vanga dik lo taka sum lakluh duhna a lansarh thu a sawi

Chief Minister chuan ram hmasawn zelnaah khawtlang nun siamṭhat ngai tam tak a awm thu sawiin, "Chung zingah chuan hausak thut duh avanga dik lo taka sum lakluh pawi tih lohna leh ruihhlo a langsar. YMA-in a do kawnga hma a lakna a fakawm," a ti.

Ruihhlo leh hausak thut duhna chu sorkar leh pawl pakhat emaw, kohhran ang chauha do hneh theih a nih loh avangin ram pum mipui thawhho a pawimawh thu Zoramthanga chuan a sawi a ni.

CM chuan digital age-a nasa tak maia khawvel in hma a sawnnaah chanchin ṭha aiin chanchin ṭha lo a darh chak zawk tih mai theih tur a nih thu sawiin, "Fimkhur a ṭul. Kan ram chungchang sawi hian natna chi hrang hranga a ber kainate, ruihhlo leh thil dangah a ṭha lo zawnga lan-na kan nei fo hi thil pawi tak a ni," a ti.

CM Zorama chuan, chak lohna leh ṭhat lohna sawite hian siamṭhat duhna thinlung ti hnualin, beidawnna a thlen zawk ang tih erawh a hlauhawm thu a sawi.

Chhiatni ṭhatnia Mizote inṭawi-awm dan leh thil ṭha tam tak khawtlang nuna awmte hriat reng a pawimawh tih sawiin Chief Minister chuan, "Sorkar, kohhran, NGO leh mipuite'n pawnfen sawichhingin, khawvel in a entawn tur ni thei kan ni tih hriain, a beidawng zawnga kal lo in, insiamṭhain hmasawn zel turin hma la ang u," a ti.

CYMA president R Lalngheta pawhin thu sawiin, sum duh luat vanga kut tling loa sum lakluh pawi ti lo an tam lutuk chu veiawm a tih thu sawiin, "Hengte hi ram tichhetu a ni tih hriat a pawimawh," a ti a, ram siamṭhat hi pawl, kohhran leh sorkar hruaitu leh hotute kut chauha awm a nih loh thu a sawi.

CM hian Zemabawk YMA Silver Jubilee a hmanpui pah hian Indian Oil Corporation Ltd. (IOCL) corporate social responsibility aṭanga sum hmuh cheng nuai 26.8 senga 'Thlanmual In' sak a hawng nghal a ni.