PM hoin G20 sawiho

Prime minister Narendra Modi chuan December 9, Zirtawpni tlaiah khan India in Group of 20 (G20) Presidency dinhmun a chelh chungchanga G20 meeting peng hrang hrang thlen tur inbuat­saihna kal mekah state leh union territory tina Gover­nor/ Lt. Governor leh Chief Minister-te video conference a neih­pui a, chief minister Zoram­thanga pawh a tel.

Video conference hi Union Home minister Amit Shah-a'n a kaihruai a; Prime Minister chuan, state tin thawhhona a pawimawh thu sawiin, "India in G20 Presidency a chelh chhung hi khawvel hmuha India ram hmasawnna leh ropuinate pho chhuahna hun ṭha a ni tih hria in, mi tin lungrual leh ṭha-­hnemngai taka thawhho a pawimawh dawn," a ti a; state hrang hrang mawina leh theihnate pholan nan India ram khawpui hrang hrangah meeting hmun ruahman a nih thu leh, state tinte chu an theihna pho chhuak a, hmasawnna remchangah an hman ngei a beisei thu a sawi.

G20 meeting hi Mizoram chuan March 2023 khian a thleng dawn a, multilateral business partnership session tih niin, in sumdawn­tawnna leh thawhhona chungchang sawiho a ni ang. Sawihonaah hian bamboo/ hor­ticulture, handloom leh handicrafts bakah, nursing & paramedics-te thlurbing bik tura ruahman a ni.

Video conference-ah hian chief secretary Dr Renu Sharma, Home secretary H Laleng­mawia, IGP (Inte­lligence) Veenu Bansal bakah, Home depart­ment leh Commerce & Industries depart­ment hotute an tel.

G-20 hi ram 19 leh European Union-te'n khawvel economy-a harsatna thlentu hrang hrang sutkian leh hmasawn tlân theihna tura inkawmhona (forum) an din a ni a; member-te chu - Argentina, Australia, Brazil, Canada, China, France, Germany, India, Indonesia, Italy, Japan, Mexico, Russia, Saudi Arabia, South Africa, South Korea, Turkey, United Kingdom, United States leh European Union an ni.

India in Presidency a chelh chhung hian prime minister Narendra Modi chu G20 Chairman a ni ang.