Pastor pension tawhte politics-a inhman dan tur kaihhruaina Synod-in hnawl

Synod Inkhawmpui vawi 99-na, Khatla Kohhran biak-ina neih chuan, pastor/ minister pension tawhte politics-a an inhman dan tur rawtna leh kaihhruaina duan a hnawl. Inkhawmpui hi nizan khan a ṭiak a ni.

Pastor/minister pension tawhte politics-a an inhman dan tur kaihhruaina siam rawtna chu Synod inkhawmpui hmasa lamah pawm a lo ni tawh a, kaihhruaina siam turin Synod Executive Committee (SEC) ruat a ni. SEC chuan kaihhruaina siamin, kumina Synod Inkhawmpuia pawmpui turin an thlen a, mahse, December 10, Inrinnia Synod inkhawmpui rorel chuan hnâwlin, "Kan sawihona hi a tâwk e," an ti.

Inrinnia rorelnaah hian SEC aṭanga thu lutte ngaihtuah a ni a; an rorel zingah - Synod Mission Board hnuaia pastor lak dan policy neih te, Synod Inkhawmpui thlengtu puihna Rs 10,00,000 aṭanga Rs 15,00,000-ah tihpun te, zirna tihhmasawn nan kohhran leh sorkar thawh dunna tura rawtnate a tel.

Zirna tihhmasawn nan kohhran leh sorkar thawh dunna tura rawtna chu a tlangpuiin ṭha an ti a, chûlmâm ngaite an chûlmàm hnuah SEC bawhzui turin an dah. Kum 2023-24 atana Synod budget ruahmanna an pawm bawk.

Synod Inkhawmpui hi December 6, Thawhlehni zan khan ṭan a ni a; nimin khan chawhma inkhawmah moderator Rev. Dr C Chawng­hmingliana'n pastor atan probationary pastor ni lai mi 15 a nemnghet a, pro. pastor atan mi 17 a dah nghet bawk. Chawhnu inkhawmah Lalpa Zanriah Sakramen ṭheh a ni.

Mizoram Synod-ah hian kohhran member 6,18,854 an awm mek a, mipa 3,00,279 leh hmeichhia 3,05,214 an ni. Presbytery 47, pastor bial 297, probationary pastor 45, tualchhung kohhran 1,130, branch church 77, preaching station 665, pastor/minister 571, kohhran upa 5,725 an awm mek bawk.