Mipuiin kalphung thar an nghakhlel - ZPM Working President

ZPM hruaitute chuan Lengteng bial khaw hrang hrang tlawhin, vantlang inkhawmah an buatsaih ṭhin a, ZPM working president K Sapdanga chuan mipuiin kalphung thar an nghakhlel niin a sawi.

K Sapdanga chuan an party-in kalphung thar aupuiin Zoram kiltin kan fang kual tih sawiin, "Heta kan thil hmuhchhuah chu khaw tinah mipuiten kalphung thar an nghakhlel em em a ni tih hi a ni. Khaw kilkhawr apiangah an mangang leh zual. Nitin mi thar duhawm tak takin ZPM party hi an bawh ruih ruih a ni," a ti.

ZPM-in mipui mamawhna an phuhru zo lo ang tih an hlau tih sawiin ZPM Working President chuan, "Ram pum huapa kalphung thar kal pui a, mipui huapzo hmasawnna a thlen theihna tûrin kan inbuatsaih sauh sauh a ni. ZPM chuan last minute hmanga rorêl tumna dah kan tum," a ti a, last minute politics dah nil theitu chu mipui an nih thu a sawi.

K Sapdanga chuan dahkham politics pawh tihbo an tum thu sawiin, "Mi hausa ṭhenkhatin inthlan dawn hnaiah sum tam tak party ṭhenkhat hnenah an dahkham ṭhin. Inthlan zawh veleh tu party pawh sorkar se la, suitcase nen Mc Donald Hill an pan chho a, work order hmangin leiba an ṭhing thin a ni. Kan ram roreltuten tu emaw sum bawm milin hlauh an nei ṭhin," a ti.

Thusawitu dang, ZPM consultant F Rodingliana chuan, "Pathian miten he ram an kaihruai loh chuan kan ramin hma a sawn thei dawn lo. Mi fing tak tak, mi ṭha tak tak awm mah se, Lalpa duh dana ro kan rel loh chuan kan ral dawn a ni," a ti a, kan hma lawka inthlan kan hmachhawn turah hian Pathian lal ram din thei tur mi kan zawn a ngaih thu a sawi.

ZPM party thuchhuah tarlan danin, ZPM Working President hian Lengteng North leh South block aṭangin an party-ah 761 a lawmlut a ni.