Ṭhuamluaia Muala phullem phah hawng

PMJVK Scheme kaltlanga cheng nuai 569.61 senga C Ṭhuamluaia Muala phullem (synthetic football turf) phah thar leh MSSC-TATA Trusts Grassroots Football Academy pariat chu December 10, Inrinni khan Sports & Youth Services (SYS) minister Robert Romawia Royte in a hawng.

Sports minister Robert Romawia Royte chuan, Mizorama infiamna peng hrang hrang leh ruhrelte tih hmasawn zel kawngah SYS department chuan theihtawp a chhuak mek zel rih a sawi a, "Lunglei khawpuia kawng siam pawh tun thla chhunga zawh fel a nih tur thu leh veng chhung inkalpawhna kawngte pawh PWD in an siam thuai dawn," a ti a; sorkar laipui kaltlanga ruahmanna lian tham tak tak thawh chhoh mek a ni. Lunglei district-ah pawh ruahmanna hrang hrang - District Sports Complex, Rahsiveng, bakah Futsal ground eng emaw zat, Leitlangpui Hockey Ground, Futsal Ground Ramthar Veng, Zobawk Residential Sports School, Electric Veng Astro Turf Football Ground sak hnate kalpui mek a nih thu a sawi.

Infiamna ruhrel ruahmante hmang ṭangkaiin Lunglei district chu sports hub pawimawh tak a la ni chho dawn tih sawiin Minister chuan, "Lunglei khawpui hmasawn zelna kawnga pawimawh tak Lunglei Municipal Council chu Lunglei mipuite tana lawmawm tak a ni. LMC din anih chuan thuneihna semzaina a takin kan hmu ang a, mipui thlan an aiawhte'n khawpui enkawlna kawngah mawhphurha leh thuneihna sang zawk an nei dawn a ni," a ti bawk.

He hunah hian minister C Lalrinsanga, MLA pahnih Lawmawma Tochhawng leh Dr Vanlalṭanpuia te, Sports, Youth Affairs, ICT & Tourism Development Board vice chairman TC Pachhunga leh Bamboo Development Board vice chairman Dr K Pachhunga bakah, infiamna pawl hrnag hrang hruaitute an tel.

C Ṭhuamluaia Muala phullem phah hna hi M/s Decor India, GS Road, Guwahati in PMJVK Scheme 2020-21 kaltlanga hmuh cheng nuai 569.61 sengin an thawk.

Lunglei district-ah hian MSSC-Tata Trusts Grassroots Football Academy centre pariat - Serkawn, Haulawng, Electric Veng, College Veng, Lunglawn, Lungsen, Tlabung leh West Bunghmunte a awm. Mizoram pumah centre 60 awmin tun dinhmunah trainees 1,800 vel an awm mek a ni.

Infiamna ruhrel hawnnaah hian Mizoram Football Association honorary secretary Lalnghinglova Hmar chuan December 10-30, 2022 chhunga Ṭhuamluaia Muala khelh tur 'Lianzuala Chhangte Age Group Football League' a hawng nghal a ni.