Dr Thangtea'n supply kudam a hawng

South Tuipui bialtu MLA Dr R Lalthangliana, minister chuan December 9, Zirtawpni khan a bial chhunga Tarpho khuaah supply kudam thar a hawng.

Dr R Lalthangliana chuan, sorkarin mipui tana hmasawnna ruhrel a dinte a chhawr ṭangkaitu mipuite'n neitu rilru puin uluk leh ṭha taka an enkawl a ṭul thu a sawi a, "Covid in kum hnih leh a chanve dawn min tihbuai avangin sorkar sum a harsa a, vawk hri, ramri buai leh Myanmar buaina avangin raltlante buaipui an ngai a, tunah pawh Bangladesh aṭanga raltlante buaipui a ṭul," a ti a, duh leh beisei anga hmasawnna kalpui chak theih a nih lohnaah mipuite chu hrethiam tur leh Pathianin hun ṭha a hawn sak leh ngei a rin thu a sawi.

Hawnna inkhawm hi Lunglei DCSO Carolyn LB Khiangte in a kai­hruai a; Tarpho VCP Lalchangliana chuan sorkarin an khawtlang mamawh kudam a sak sak chu an lawmthu sawiin, January 2023 aṭang chuan kudam thar aṭang ngeiin buhfai khulchhuah an beisei thu leh an ngen thu a sawi. DCSO chuan chak taka hmalak nghal a nih dawn thu a sawi a ni.

NABARD Ware­housing Scheme hnuaiah Tarpho, Khawhri leh Aithur khuaahte kudam thar sak nan Rs 1,70,68,972 hmuh a ni a, Tarpho khuaah kudam sak hna hi Babie Construction & Consultancy Services-te'n thawkin, buhfai quintal 2000 leng thei tura ruahman a ni.