Zirlai chhungkaw harsate hnenah Lengteng MLA-in tanpuina a sem

Lengteng bialtu MLA Dr L Thang­mawia, Sialkal Range Development Council (SRDC) chairman ni bawk chuan December 10, Inrinni khan MZP Conference Hall-ah a bial chhung leh SRDC huam chhunga zirlai chhungkaw harsa mi 38 hnenah MLA Fund leh SRDC Fund aṭangin ṭanpuina Rs 5,10,000 a sem.

SRDC development officer Remlal­liana Hnamte kaihhruai zirlai harsate hnena ṭanpuina semna inkhawmah hian Dr L Thangmawia chuan, “Chhungkaw harsa taka aṭanga lehkha zir ṭhin ka ni a, retheihna hi zirna hlawhchham phah nana chhuanlam tling a ni lo. Kan lehkhathiam hmasa chhuanawm tak takte kha retheihna hneha hlawhtlinna chang an ni deuh vek a ni,” a ti.

Kum 2018-a MNF sorkar a lo pian hnu khan Assembly speaker Lalrinliana Sailo kaihhruai General Purpose Committee-ah a telve thu sawiin Dr L Thangmawia chuan, "Committee-ah hian Chief Minister pawh a tel a, committee chuan MLA Fund hman theihna pakhat ‘GIA to Educational Insitutions’ tih ṭhin chu ‘GIA to Education’ tia thlak turin thutlukna a siam ta a, chuvang chuan zirna-in chauha MLA Fund hman theih ṭhin kha zau zawkin zirna lamah a hman theih tawh," a ti a; kum 2019 aṭang khan Lengteng bialah MLA Fund aṭangin zirna kaihhnawihah cheng nuai 20 chuang hman a nih tawh thu a sawi.

MLA Fund aṭanga zirlai ṭanpuina hi BDO, Ngopa Chairman-na hnuaiah a thlangtu tur committee din a ni a, First Division-a pass chin, chhungkaw harsa aṭanga thlan an ni.

Kum 2019 khan MLA Fund aṭangin zirlai 13 hnenah Rs 2,10,000, kum 2020 khan zirlai 18 hnenah Rs 2,50,000 sem a lo ni tawh a; Covid hripui leng avangin kum 2021 khan sem a ni lo a, kumin 2022 hian zirlai 29 thlan chhuahte hnenah Rs 3,94,000 sem a ni. SRDC Fund aṭanga zirlai ṭanpuina pek turte hi SRDC hnuaia Hostel & Education Committee-in a thlang a; kum 2020 khan zirlai 15 hnenah Rs 2,00,000 sem niin, kuminah hian zirlai pakua hnenah Rs 1,16,000 sem a ni.

He hunah hian MLA Fund aṭangin pawl 11 zirlai mi pasarih leh pawl 12 zirlai mi pathum hnenah Rs 12,000 ṭheuh; bachelor degree zirlai mi 15 hnenah Rs 14,000 ṭheuh leh Master degree zirlai mi pali hnenah Rs 16,000 ṭheuh, a vaiin zirlai 29 hnenah Rs 3,94,000 sem a ni.

SRDC Fund hi HSSLC zirlai mi paruk hnenah Rs 12,000 ṭheuh; bachelor degree zirlai mi pahnih hnenah Rs 14,000 ve ve leh master degree zirlai mi pahkhat hnenah Rs 16,000, a vaiin mi pakua hnenah Rs 1,16,000 sem a ni bawk.